Oralda «Boryshker-2017» sharasy aıasynda úsh kúnde 0,5 mln teńge óndirildi
ORAL. QazAqparat - Oral qalasynda 20-28 aqpan aralyǵynda «Boryshker-2017» jedel aldyn alý sharasy ótkizilýde, dep habarlaıdy «QazAqparat» HAA tilshisi.
Qalalyq ishki ister basqarmasy ákimshilik polıtsııa bóliminiń bastyǵy, polıtsııa podpolkovnıgi Tımýr Maıranovtyń aıtýynsha, alǵashqy úsh kúnniń ishinde 482 996 teńge óndirildi. Atap aıtqanda, tártip saqshylary birinshi kúni-aq ákimshilik aıyppulyn tólemeı júrgen 21 quqyq buzýshynyń mekenjaıyna baryp, 45 380 teńgeni memleket paıdasyna óndirdi. Ekinshi kúni 51 mekenjaıda bolǵan olar 100 969 teńgeni tólettirdi. Májbúrlep óndirip alý boıynsha 63 630 teńge tústi. Úshinshi kúni 44 mekenjaıda bolǵan ınspektorlar 204 046 teńgege qosa, 42 420 teńgeni májbúrli túrde óndirdi. Shara odan ári jalǵasýda.
«Prokýratýra qyzmetkerleri, sot oryndaýshylarymen birlesip jumystanýdamyz. Ádette ákimshilik quqyq buzǵandarǵa qatysty materıaldar tolyqtaı jınaqtalyp, sotqa joldanady. Aıyppulyn tólemese, QR Ákimshilik quqyqbuzýshylyq kodeksi 669-babyna sáıkes sot úkimi ne sheshimin, ózge de aktisin jáne atqarýshylyq qujatty oryndamaý jeke tulǵalarǵa 10, laýazymdy adamdarǵa, jeke notarıýstarǵa, jeke sot oryndaýshylaryna, advokattarǵa 20 AEK kóleminde aıyppul salýǵa nemese bes táýlikke deıin ákimshilik qamaýǵa alýǵa, shaǵyn kásipkerlik nysandaryna 30, ortalaryna 40, iri kásipkerlerge 50 AEK kóleminde aıyppul salýǵa ákep soǵady», dedi Tımýr Maıranov.
