Oralda bopsalaý jáne tonaýmen aınalysqan qylmystyq top quryqtaldy
ORAL. KAZINFORM — Batys Qazaqstan oblysy polıtsııa departamentiniń uıymdasqan qylmysqa qarsy kúres basqarmasynyń qyzmetkerleri jedel izdestirý is-sharalary barysynda birqatar aýyr qylmysqa qatysy bar qylmystyq topty qolǵa túsirdi.
BQO polıtsııa departamentiniń baspasóz qyzmetinen málim etkenindeı, tergeý derekterine sáıkes, kúdiktiler kúsh qoldanamyn dep qorqytý, sondaı-aq bótenniń múlkin joıý nemese búldirý qaýpin tóndirý arqyly bopsalaý áreketterin jasaǵan.
Sonyń nátıjesinde olar zańsyz túrde iPhone 15 Pro uıaly telefony men aqshalaı qarajatty ıemdengen.
— Budan bólek, keshki ýaqytta J.Dosmuhamedov kóshesinde kúdiktilerdiń 80 myń teńge kólemindegi aqshany ashyq túrde jymqyrǵany anyqtaldy. Sondaı-aq olardyń buǵan deıin de qylmystyq jaýapkershilikke tartylǵany belgili boldy. Atap aıtqanda, uıaly telefondardy urlaý jáne tonaý derekteri boıynsha jaýapqa tartylǵan. Qolǵa túskender Oral qalasy polıtsııa basqarmasynyń ýaqytsha ustaý ızolıatoryna qamaldy. Atalǵan derekter boıynsha sotqa deıingi tergeý amaldary júrgizilýde, — dep habarlady vedomstvodan.
Eske sala keteıik, budan buryn Oralda er adamnyń esirtkimen qolǵa túskenin jazǵan edik.
