Oralda bolǵan órtten 2 sábı zardap shekti
ORAL. QazAqparat - Oral qalasynda keshe saǵat 14.55-te órt bolyp, eki bala zardap shekti, dep habarlaıdy «QazAqparat» tilshisi.
BQO TJ departamenti órt sóndirý jáne apattyq-qutqarý jumystary qyzmetinen túsken málimetke qaraǵanda, órt Zachagan kenti, Murat Móńkeuly kóshesi, 81/1-úı 71-páterinde bolǵan. Úıdiń tórtinshi qabatyndaǵy páterde jeke zattar men jıhaz janǵan.
Turǵyndar órt sóndirýshiler kelgenge deıin óz avtokólikterimen gazdan ýlanǵan 2013 jáne 2015 jylǵy eki balany oblystyq kópbeıindi balalar aýrýhanasyna jetkizgen.
Oqıǵa ornynan 15 adam qaýipsiz jerge shyǵarylsa, sonyń úsheýi - balalar. Aýmaǵy 30 sharshy metrdi qamtyǵan órtti sóndirýge 3 tehnıka, 14 adam qatystyrylǵan.
Qazirgi kezde órttiń shyǵý sebepteri, keltirilgen shyǵyn men kináli adamdar anyqtalýda.
Oblystyq kópbeıindi balalar aýrýhanasy dırektorynyń uıymdastyrý-ádistemelik jumystar jónindegi orynbasary Qarlyǵash Dostaevanyń aıtýynsha, balalardyń ekeýiniń de jaǵdaıy jaman emes. Úlkeni bólimshede tamaǵyn iship, emin alýda. Kishisi ázirge jansaqtaý bóliminde dárigerlerdiń baqylaýynda.
