Oralda bokstan jasóspirimder arasynda Qazaqstan chempıonaty aıaqtaldy

ORAL. KAZINFORM – Oral qalasyndaǵy «Jaıyq arena» sport kesheninde bokstan jasóspirimder arasyndaǵy Qazaqstan Respýblıkasynyń chempıonaty óz máresine jetti.

Alty kúnge sozylǵan baıraqty básekege elimizdiń túkpir-túkpirinen 230-ǵa jýyq jas bylǵary qolǵap sheberi qatysyp, baq synady.

Boksshylar 33-ten 70 kelige deıingi salmaq dárejelerinde chempıondyq ataq pen júldeli oryndardy sarapqa saldy.

Jarys qorytyndysy boıynsha jalpy komandalyq esepte Túrkistan oblysynyń quramasy kósh bastady. Ekinshi orynǵa Almaty oblysy kóterildi. Al Shymkent qalasynyń sportshylary úzdik úshtikti túıindedi.

Chempıonatta Batys Qazaqstan oblysynyń jas sportshylary da joǵary deńgeıdegi daıyndyqtaryn kórsetip, jaqsy nátıjelerge qol jetkizdi. Atap aıtqanda, 46 keli salmaq dárejesinde óner kórsetken Nıet Ómirzaqov chempıon atanyp, «Úzdik tehnıkasy úshin» atalymyna ıe boldy. Al 49 keli salmaq dárejesinde synǵa túsken Sultan Myrzaǵalıev qola júldeni qanjyǵasyna baılady.

BQO dene shynyqtyrý jáne sport basqarmasynan alynǵan málimetke qaraǵanda, sonymen qatar birinshilik aıasynda boks bapkerlerine arnalǵan mazmundy semınar-trenıng uıymdastyryldy.

Іs-sharany Olımpıada chempıony Danııar Eleýsinovtiń ákesi, Qazaqstan Respýblıkasynyń eńbek sińirgen jattyqtyrýshysy Marat Tálipuly júrgizdi.

Semınar barysynda tájirıbeli maman bokstaǵy kóp jyldyq eńbeginen syr shertip, jas sportshylardy daıarlaýdaǵy tıimdi ádisterge, jekpe-jek ústindegi taktıkalyq sheshimderge, sondaı-aq oqý-jattyǵý úderisiniń qyr-syryna keńinen toqtaldy. Atalǵan bas qosý bapkerler úshin tájirıbe almasyp, kásibı sheberlikti shyńdaýǵa múmkindik berdi.

Chempıonat qorytyndysyna sáıkes Tashkentte ótetin Azııa chempıonaty jáne basqa jarystarǵa baratyn Qazaqstan jasóspirimder quramasy jasaqtalady.

Eske sala keteıik, budan buryn Oraldaǵy jarystan keıin Azııa chempıonatyna baratyn jasóspirimder irikteletinin jazǵan edik.