Oralda bokstan halyqaralyq týrnır bastaldy
ORAL. QazAqparat - Búgin Oraldaǵy jabyq muz aıdyny saraıynda Qazaqstan Respýblıkasy boks federatsııasynyń qurmetti prezıdenti Beket Mahmutovtyń júldesi úshin jastar arasynda birinshi halyqaralyq týrnır bastaldy, dep habarlaıdy «QazAqparat» HAA tilshisi.
Olımpıadalyq sport túrleriniń ishinde dúnıejúzilik dodalarda qazaqstandyqtar únemi jeńimpazdar qatarynan kórinip kele jatqan boks ónerin keńinen óristetý maqsatynda Qazaqstan boks federatsııasynyń qoldaýymen BQO dene shynyqtyrý jáne sport basqarmasy uıymdastyryp otyrǵan jarysqa Qazaqstan, Qyrǵyzstan, Ózbekstan, Reseı jáne Japonııa elderinen 130-ǵa tarta sportshy qatysýda. 1999-2000 jylǵy jastar 10 salmaq dárejesi boıynsha synǵa túsip, jeńimpaz-júldegerler anyqtalatyn bolady.
«Osynaý halyqaralyq týrnır batysqazaqstandyq jas bylǵary qolǵap sheberlerin olımp shyńyna jeteleıtin alǵashqy baspaldaq bolsyn», dedi jarystyń ashylý rásiminde BQO dene shynyqtyrý jáne sport basqarmasynyń basshysy, bokstan AIBA tóreshisi Ásııa Amanbaeva.
Jarystyń qurmetti qonaqtary qatarynda QR eńbek sińirgen jattyqtyrýshysy Tursynǵalı Edilov, AIBA tóreshisi Serik Ábdenálıev, álem chempıony, olımpıada oıyndarynyń eki márte kúmis júldegeri Bolat Jumadilov, olımpıada oıyndarynyń qola júldegeri Serik Eleýov, álem chempıony Erdos Jańabergenov, álem chempıony Galıb Jafarov pen onyń bapkeri Álimbek Balmaǵambetov bar.
«Bul dodaǵa Ózbekstan jastar quramasynyń negizgi múshelerimen qatar ekinshi, úshinshi nómirli boksshylardy da alyp keldik. Olardyń qanshalyqty daıyndyqpen kelgendigin jekpe-jekter kórsetetin bolady. Týrnırge Galıb Jafarovtyń shaqyrtýymen keldik», dedi Ózbekstan jastar quramasynyń memlekettik jattyqtyrýshysy Tolashbaı Danııarov.
Aıta keteıik, BQO-nyń namysyn kóptegen jarysta abyroımen qorǵap júrgen Nursultan Nurıdenov 49 kg salmaqta birinshi kezdesýinde Almaty oblysynyń ókili Jaqsylyq Ahmetti biraýyzdan jeńdi.
