Oralda «Bókeı ordasyndaǵy jer úshin kúres» atty kitap tanystyryldy
ORAL. QazAqparat - Qadyr Myrza Álı atyndaǵy mádenıet jáne óner ortalyǵynda batysqazaqstandyq ǵalym, tarıh ǵylymdarynyń kandıdaty, «Úzdik jas ǵalym» atalymynyń ıegeri Saıalbek Ǵızzatovtyń «Bókeı ordasyndaǵy jer úshin kúres» atty kitabynyń tanystyrylymy boldy.
M.Ótemisov atyndaǵy Batys Qazaqstan memlekettik ýnıversıtetiniń birinshi prorektory, tarıh ǵylymdarynyń doktory Áset Tasmaǵambetov jańa kitap jas ǵalymnyń sońǵy jyldardaǵy eńbeginiń jemisi, óńir tarıhyn zertteýge qosylǵan súbeli úles ekendigin aıtyp, aq jol tiledi. Budan keıin avtordyń ákesi Mahambet Ǵızzatovpen birge monografııalyq jınaqtyń tusaýyn kesti.
Shara barysynda Saıalbek Ǵızzatov óziniń eńbegi, ǵylymı izdenisteri týrasynda sóz qozǵap, oqyrmandarynyń saýaldaryna jaýap berdi.
Kitap avtoryn quttyqtaýshylar «Bókeı ordasyndaǵy jer úshin kúrestiń» el táýelsizdiginiń týra 25 jyldyq torqaly toıy qarsańynda jaryq kórip otyrǵandyǵyn, onyń halqymyzdyń azattyq jolyndaǵy ǵasyrlar boıǵy arpalysynyń óńirdegi bir kezeńin kórsetetinin aıtyp, ǵalymnyń aldaǵy ýaqytta da tabysqa jete berýlerine tilektestigin bildirdi. Shyndyǵynda Bókeı handyǵynda da týǵan jer úshin atqa minip, urandatyp, jaýǵa shapqan batyrlarmen qatar shekara úshin shyryldaǵan qaıratker tulǵalar az bolmaǵan. Kitap solardyń eńbegin áıgilep, esimin ulyqtaýymen de qundy.
Aıta keteıik, Saıalbek Ǵızzatov 1984 jyly Aqjaıyq aýdany Jańabulaq aýylynda dúnıege kelgen. 2005-2013 jyldary M.Ótemisov atyndaǵy Batys Qazaqstan memlekettik ýnıversıtetinde oqytýshy, fakýltet dekany qyzmetterin atqardy. 2013 jyldan beri BQO din isteri basqarmasynda bólim basshysy retinde osy salaǵa da óz úlesin qosyp keledi. Otyzdan astam ǵylymı eńbektiń avtory.
