Oralda blokpostty aınalyp, qashqan júrgizýshi ustaldy
ORAL. QazAqparat – Oralda karantındik shekteý sharalaryna baılanysty ornatylǵan blokpostty aınalyp, qashqan júrgizýshi ustaldy, dep habarlaıdy QazAqparat tilshisi.
BQO polıtsııa departamentiniń resmı ókili, polıtsııa polkovnıgi Bolatbek Belgibekovtiń aıtýynsha, oqıǵa búgin saǵat 04.50-de boldy.
1991 jylǵy júrgizýshi «Toıota Kamrı» avtokóligimen polıtsııa qyzmetkerleriniń talabyna baǵynbaı, Jáńgir han kóshesi boıyndaǵy blokpostty aınalyp ótip, Oral-Atyraý jolymen júıtkigen. Degenmen ol Báıterek aýdany Şapov aýyly tusynda qolǵa tústi.
N. esimdi azamat budan buryn mas kúıinde rýlge otyrǵany ári jyldamdyqty shekten tys arttyrǵany úshin 2018 jyldyń jeltoqsanynda kólik júrgizý quqyǵynan aıyrylǵan bolyp shyqty. Soǵan qaramastan, rýlge qaıta otyrǵan.
«Osy oqıǵa boıynsha QR Ákimshilik quqyqbuzýshylyq kodeksi 612-baby 3-bóligi (kólik quralyn basqarý quqyǵynan aıyrylǵan júrgizýshiniń kólik quralyn basqarýy) jáne 613-baby 3-bóligine (ishki ister (polıtsııa), kóliktik baqylaý organdary qyzmetkeriniń Qazaqstan Respýblıkasynyń Memlekettik shekarasy arqyly avtokólik quraldaryn ótkizý pýnktterinde jáne Qazaqstan Respýblıkasynyń aýmaǵyndaǵy kóliktik baqylaý beketterinde, áskerı polıtsııa organdary qyzmetkeriniń talaptaryn oryndamaý, alkogoldik, esirtkilik jáne (nemese) ýytqumarlyq masań kúıin kýálandyrýdan ótýden jaltarý) sáıkes ákimshilik hattama toltyryldy», dedi QazAqparat tilshisine B.Belgibekov.
Eske sala keteıik, budan buryn BQO-da mas kúıinde jol-kólik oqıǵasyn jasaǵan turǵynnyń 4 jylǵa bas bostandyǵynan aıyrylǵanyn jazǵan bolatynbyz.
Al budan buryn Oralda qazaqstandyq blogerdiń karantınge qaramastan kesh ótkizgenin jazǵan bolatynbyz.
