Oralda blogerge qatysty sot talqysy bastaldy

ORAL. KAZINFORM – Oral qalasynda bloger Aıbolat Bókenovke qatysty basty sot talqysy júrip jatyr.

Sot talqysynda aıyptaý tarabynyń ókili málim etkenindeı, A.Bókenov Facebook jáne Instagram áleýmettik jelilerinde paraqsha ashyp, memlekettik qyzmetshilerdi synap, túrli máselelerdi kóterip, kóp oqyrman jınaǵan.

Sodan keıin osy jaǵdaıdy paıdalanyp, ońaı jolmen aqsha tabýǵa kirisken. Aldymen mekenjaıyn sý basqan Oral qalasynyń turǵynyn úı alyp beremin dep aldap, 170 myń teńgesin ıemdengen. 

Aıyptaý tarabynyń málimeti boıynsha alaıaqtyq baǵyttaǵy qylmystaryn jalǵastyrǵan A.Bókenov oraldyq jazýshynyń kitabyn shyǵarý úshin qarajat jetispeı jatqanyn estip, onymen demeýshi taýyp beremin dep kelisken. Alaıda túrli adamdardan alǵan aqshalaryn ózi jaratyp jibergen. Ol sonymen qatar Májilis depýtatymen otyrmyn, ústel shyǵyndaryn jabý úshin dep, qarjy surap, taǵy eki adamdy aldaǵan. 

Osylaısha, A.Bókenov QR QK 190-baby 3-bóligine sáıkes birneshe ret qylmysqa barǵan.

Sonymen qatar aıyptalýshy Jańaqala aýdany Jańaqala aýyldyq okrýginiń ákimi A.Qapanovqa qatysty ákimdik tehnıkasyn óziniń jeke maqsatyna paıdalanyp júr, ony ornynan alý kerek dep, áleýmettik jelide birneshe post jarııalaǵan. Postardy óshirý úshin A.Baqtygereev arqyly 1 mln teńge suraǵan. Aqyry A.Bókenov A.Baqtygereevten 300 myń teńge alyp, boı tasalap bara jatqan mezgilde QR UQK BQO boıynsha departamenti qyzmetkerlerimen ustalǵan. Sóıtip ol QR QK 194-baby 1-bóligine sáıkes qylmys jasaǵan.

Oǵan qosa jábirlenýshilerden aldaý jolymen alǵan 830 myń teńgeni Olımpbet býkmekerlik keńsesine bás tigý arqyly 1 mln 244 myń 917 teńge zańsyz paıda tapqan. ıAǵnı QR QK 218-baby 1 bóligi (qylmystyq jolmen tapqan aqshany zańdastyrý) boıynsha qylmysqa barǵan. 

Sot otyrysy jalǵasýda. 

Eske sala keteıik, budan buryn BQO-da sheneýnikti bopsalaǵan blogerdiń ústinen qylmystyq is qozǵalǵanyn jazǵan bolatynbyz.