Oralda bilim sapasy, kreatıvti ındýstrııa jáne parasportty damytý máseleleri talqylandy
ASTANA. KAZINFORM – Batys Qazaqstan oblysynda Prezıdent Qasym-Jomart Toqaevtyń «Jańa tarıhı kezeńdegi Qazaqstannyń ózekti mindetteri» atty Joldaýynda belgilengen basym baǵyttardy júzege asyrý máseleleri talqylandy, dep habarlady QR Quryltaıynyń baspasóz qyzmeti.
11 qarashada Oral qalasynda Quryltaı depýtaty Snejanna Imasheva, Qazaqstan Halyq Keńesiniń múshesi Murat Muqaev, Energetıka vıtse-mınıstri Qaıyrhan Tutqyshbaev jáne Ulttyq ekonomıka vıtse-mınıstri Baýyrjan Omarbekov bilim, mádenıet jáne sport salalarynyń ókilderimen kezdesti.
Jıyndar barysynda óńirdiń áleýmettik-ekonomıkalyq damýy, bilim berý júıesin jetildirý, shyǵarmashylyq bastamalardy qoldaý jáne sport ınfraqurylymynyń qoljetimdiligin arttyrý máseleleri kóterildi.
Alǵashqy kezdesý Qazaq ınnovatsııalyq jáne telekommýnıkatsııalyq júıeler ýnıversıtetinde ótti. Oǵan joǵary oqý ornynyń oqytýshylary men stýdentteri qatysty.
Ashyq dıalog barysynda bilim berý júıesin jańǵyrtý, bilikti mamandar daıarlaý jáne jastardyń eldiń qoǵamdyq-ekonomıkalyq ómirindegi rólin arttyrý máseleleri talqylandy.
Quryltaı depýtaty Snejanna Imasheva Prezıdent Joldaýynda belgilengen mindetterdi júzege asyrýǵa memlekettik organdarmen qatar qoǵam ókilderi de atsalysýy qajet ekenin atap ótti.
– Prezıdent Joldaýy – aldaǵy jyldarǵa arnalǵan elimizdiń áleýmettik-ekonomıkalyq damý baǵdary. Onda aıtylǵan árbir mindetti oryndaý úshin Úkimet, barlyq deńgeıdegi ákimder men Quryltaı depýtattary aýqymdy jumys atqarýy kerek. Memleket basshysynyń bıylǵy Joldaýynyń máni men mazmuny erekshe. Bıyl el Táýelsizdiginiń 35 jyldyǵyn atap ótemiz. Osy jyldar ishinde biz egemen memleket retinde qalyptasyp, ózimizdiń saıası jáne ekonomıkalyq júıemizdi qurdyq, – dedi Snejanna Imasheva.
Depýtattyń aıtýynsha, Táýelsizdikti nyǵaıtý men egemendikti qorǵaý qoǵamnyń birligi men jumyla áreket etýin talap etedi. Bul úshin ekonomıkany nyǵaıtý, qoǵamdyq kelisimdi saqtaý, tártip pen jaýapkershilikti arttyrý mańyzdy.
Sondaı-aq ol eldiń damýy saıası málimdemelermen ǵana shektelmeıtinin jetkizdi. Onyń pikirinshe, bul baǵytta qýatty ekonomıka, zamanaýı ınfraqurylym, tehnologııalyq damý jáne tıimdi memlekettik basqarý mańyzdy ról atqarady.
Buǵan qosa, el ıgiligi jolynda jaýapkershilikpen eńbek etetin azamattardyń úlesine de toqtaldy.
Ýnıversıtettegi kezdesýde joǵary bilim sapasyn arttyrý máselesine erekshe nazar aýdaryldy.
Atap aıtqanda, oqý baǵdarlamalaryn eńbek naryǵynyń suranysyna beıimdeý, jastardyń kásibı daǵdylaryn jetildirý jáne jas mamandardyń áleýetin tolyq ashýyna múmkindik jasaý qajettigi aıtyldy.
Sonymen birge óskeleń urpaqtyń azamattyq jaýapkershiligin arttyrý, el bolashaǵyna sanaly kózqarasyn qalyptastyrý máseleleri kóterildi.
Budan keıin delegatsııa «Ozge Epic» kreatıvti habynda mádenıet qaıratkerlerimen júzdesti.
Kezdesý barysynda shyǵarmashylyq bastamalardy qoldaý, ulttyq qundylyqtardy saqtaý jáne kreatıvti ındýstrııanyń áleýetin arttyrý máseleleri talqylandy.
Qatysýshylar mádenıettiń ulttyq biregeılikti nyǵaıtýdaǵy, tarıhı-mádenı murany dáripteýdegi jáne qoǵamdyq sanany qalyptastyrýdaǵy róline toqtaldy.
Sondaı-aq otandyq mádenı ónimderdi keńinen tanytý, talantty azamattarǵa qoldaý kórsetý jáne shyǵarmashylyq salanyń damýyna qolaıly jaǵdaı jasaý qajettigi aıtyldy.
Jumys saparynyń kelesi baǵyty múgedektigi bar adamdarǵa arnalǵan sport kesheninde jalǵasty.
Munda delegatsııa músheleri sportshylarmen jáne jattyqtyrýshylarmen kezdesip, buqaralyq jáne kásibı sportty damytý, sport nysandarynyń qoljetimdiligin arttyrý, sondaı-aq parasportty qoldaý máselelerin talqylady.
Kezdesýde salaýatty ómir saltyn keńinen nasıhattaýdyń mańyzy da atap ótildi.
Qatysýshylar dene shynyqtyrýmen aınalysýǵa barlyq azamat úshin teń múmkindik jasaý, sport nysandarynyń materıaldyq-tehnıkalyq bazasyn jaqsartý jáne respýblıkalyq, halyqaralyq jarystarda el namysyn qorǵap júrgen sportshylardy qoldaý qajettigin jetkizdi.
Sonymen qatar sporttyń adam densaýlyǵyn nyǵaıtýmen birge múgedektigi bar adamdardyń qoǵamǵa beıimdelýine jáne kúndelikti ómirge belsendi aralasýyna yqpal etetini aıtyldy.
Kezdesýler barysynda óńir turǵyndary ózderin tolǵandyrǵan saýaldaryn qoıyp, pikirleri men usynystaryn ortaǵa saldy.
Qatysýshylar Prezıdent Joldaýynda belgilengen mindetterdi óńirde júzege asyrý joldary jóninde de oı bólisti.
Aıta keteıik, buǵan deıin Oral qalasynda ÓzgeEpic kreatıv haby ashylǵan bolatyn. Ortalyqta kontsert alańy, teatr, kınozal, kitaphana, kovorkıng keńistigi, foto, podkast jáne dybys jazý stýdııalary qarastyrylǵan. Sondaı-aq suranysqa ıe mamandyqtar boıynsha 200 kreatıvti maman daıarlaý josparlanǵan.