Oralda bıyl qaıyrymdylyq Grand baly keń aýqymda ótpekshi
BQO jastar saıasaty máseleleri basqarmasynyń basshysy Aıan Sakoshevtiń óńirlik kommýnıkatsııalar qyzmetinde málim etkenindeı, qazirgi tańda oblys jastarynyń belsendiligin, olardyń qoǵammen baılanysyn arttyrý, bos ýaqytyn tıimdi ótkizý maqsatynda túrli jobalar qolǵa alynyp, aýqymdy jumystar atqarylýda. Sonyń biri - oblys jastaryn rýhanı qoldaý, sonyń ishinde múmkindigi shekteýli jandarǵa kómek kórsetý maqsatynda dástúrli ótkizilip kele jatqan qaıyrymdylyq Grand baly.
Atalmysh Grand balyn uıymdastyrýshylardyń qataryndaǵy «Aqıqat» jastar qoǵamdyq birlestiginiń jetekshisi Mergen Súleımenovtiń aıtýynsha, qaıyrymdylyq kórsetýmen qatar ár túrli saladaǵy óńir jastarynyń basyn qosatyn sharaǵa tanymal jýrnalıster men elimizge belgili shoý bıznes ókilderi shaqyrylmaq.
Joba avtory Alpamys Sharımovtiń sózine qaraǵanda, qaıyrymdylyq balyna qatysýshy debıýtanttarǵa kastıng 3 qyrkúıek kúni qazaq drama teatrynda ótkizilmek. Kastıngke 18-29 jas aralyǵyndaǵy kez kelgen jas mamandyǵyna, kásibine qaramaı qatysa alady. Іrikteýden ótken 100 jastyń (50 jup) bir aı boıy daıyndyqtary pysyqtalady. Olarǵa «Astana opera» teatrynyń bas baletmeısteri Dosjan Tabyldy sheberlik sabaǵyn ótkizedi.
-Biz qaıyrymdylyq balyn ótkizýmen shektelip qana qoımaımyz. Joba aıasynda túrli qaıyrymdylyq, kópshilik sharalar uıymdastyrylmaq. Atap aıtsam, 30 qyrkúıek kúni debıýtanttardyń qatysýymen «Júrekten júrekke» áleýmettik sharasy ótkizilmek. Bul shara aıasynda tanymal tulǵalardyń qatysýymen shalǵaıdaǵy aýylda turatyn áleýmettik jaǵdaıy tómen otbasylarǵa tanymal estrada juldyzdarymen birge arnaıy syı-sııapat daıyndap qoıdyq. ıAǵnı, 100 debıýtant kimge kómekteskisi keletinin anyqtaıdy. Sol arqyly biz adamdardyń mekenjaılaryna «Qazposhta» AQ arqyly tosyn syı jiberemiz. Ekinshi sharamyz 30 qyrkúıek - 1 qazan kúnderi «Ár kúnge mahabbatpen» degen motıvatsııalyq trenıng túrinde ótkiziledi. Master-klasta tanymal tulǵalar ómirlik tájirıbelerimen, jetistikke jetý joldarymen bólisetin bolady. Qazir trenıngke qatysatyn tulǵalar tizimi bekitildi. Qaznette tanymal jup Marlen men Anel, mánerlep syrǵanýshy Denıs Ten, jýrnalıst Láıla Sultanqyzy sharanyń qurmetti qonaǵy bolmaq, -dedi A.Sharımov.
Sondaı-aq, bıylǵy sharaǵa qatysýshylarǵa kıim úlgilerine erekshe mán beriletini aıtyldy. Balǵa kirý dress-kody: qyz-kelinshekterde keshki kóılek, er azamattarda aq kóılek pen qyzyl kóbelek bolýy tıis.
Sonymen qatar sharaǵa tanymal estrada juldyzdary Dımash Qudaıbergen, Janar Duǵalova, Kámshat Joldybaeva, Renat Ǵaısın, arnaıy kesh qonaǵy «Eýrovıdenıe-2011» jeńimpazy Eldar Gasymov jáne basqa da óner juldyzdary keledi dep kútilýde. Keshti akter Asylhan Tólepov pen tanymal telejúrgizýshi ári aktrısa Gúlnar Selbaeva júrgizetin bolady.
Jobanyń dırektory, horeograf-baletmeıster Qarlyǵash Qadyrbekova atalmysh shara oblystyq deńgeıde emes, respýblıkalyq, tipti halyqaralyq deńgeıde ótetinin, osy sharaǵa qatysýǵa usynystar elimizdiń ózge óńirlerinen jáne Reseı men Qytaı elderinen túsip jatqandyǵyn jetkizdi.