Oralda bıyl 10 jańa turǵyn úı salynady
ORAL. QazAqparat - Oral qalasynda bıyl 9 mlrd-tan astam teńgege 10 jańa úı (1413 páter) salynbaq, dep habarlaıdy «QazAqparat» HAA tilshisi.
Turǵyndarmen eseptik kezdesýinde qala ákimi Narıman Tóreǵalıevtiń málim etkenindeı, sonyń ishinde «Nurly jol» baǵdarlamasyna sáıkes 6 úı (1008 páter) jáne memlekettik-jeke áriptestik negizinde 4 úı (405 páter) boı kótermek. Sonymen qatar 5 jańa úıdiń qurylysy boıynsha jobalaý-smetalyq qujattama jasaý jumysy jalǵasady.
Qalanyń soltústik-shyǵys bóliginde turǵyn úıler salý úshin ınjenerlik jeli tartý, Derkól aýylynda kvartalishilik joldar men sý tartý jumystary aıaqtalady. Oǵan qosa Zachagan kentinde 9 turǵyn úıge ınjenerlik jeli tartý men abattandyrý isi márege jetedi. Depovskaıa kóshesinde de ınjenerlik jeli tartylady.
Aıta keteıik, 2016 jyly memlekettik baǵdarlamalar aıasynda 8 mlrd-tan astam teńgege 11 turǵyn úı (1247 páter) paıdalanýǵa berilse, sonyń 9-y «Nurly jol» arqyly iske qosyldy. Bir úı jas otbasylarǵa arnalsa, taǵy bireýi kezekte turǵandarǵa berildi. Oǵan qosa Zachagan kentinde jas otbasylarǵa arnalǵan taǵy bir úıge qonystandyrý bastaldy. Bul 4 myńnan astam adamdy turǵyn úımen qamtýǵa múmkindik berdi.
