Oralda birneshe úıge sý kirý qaýpi tóndi
ORAL. QazAqparat – Oral qalasynda birneshe úıge sý kirý qaýpi tóndi, dep habarlaıdy QazAqparat tilshisi.
BQO TJ departamentiniń baspasóz qyzmeti málim etkenindeı, 27 naýryz kúni saǵat 16.24-te Zachagan kenti Aıazbı kóshesinde tórt úıdi sý basý qaýpi tóngeni jóninde qońyraý shalyndy.
Qardyń erýi saldarynan eki úıdiń senesine sý kirgen (deńgeıi – 5-7 sm). Taǵy eki úıdiń aýlasyna sý jınalǵan. Oqıǵa ornynda №3 mamandandyrylǵan órt sóndirý bólimshesi (2 adam, 2 motopompa, 1 tehnıka) jáne «Jaıyq taza qala» JShS (6 adam, 3 tehnıka) qyzmetkerleri sý sorý jumystaryn júrgizdi.
Sondaı-aq qalaǵa qarasty Krýgloozernyı kentinde Borısıýk pen Almaty kósheleriniń qıylysynda osyndaı jumystar atqaryldy.
Jalpy, «Jaıyq taza qala» JShS kúshimen qaladan 646398 tekshe metr qar shyǵarylyp, 17660 tekshe metr sý soryldy.
Saǵat 18.35-te Aqjaıyq aýdany ortalyǵy Chapaev aýylynda Respýblıka kóshesi №137/1-mekenjaıy mańyna da jedel qutqarý jasaǵy (3 adam, 1 motopompa, 1 tehnıka) bardy.
Keshke deıin Aqjaıyq aýdanynda TJ jáne jergilikti atqarýshy organdardyń kúshimen 860 tekshe metr sý soryldy.
Terekti aýdany Podstepnyı aýylynda da TJ kúshimen 950 tekshe metr sý soryldy.
TJ departamenti qyzmetkerleriniń sózine qaraǵanda, mundaı jaǵdaı turǵyndardyń óz aýlalarynan qardy ýaqtyly shyǵarmaýynan qalyptasyp otyr.
«Qazgıdromet» RMK málimetine qaraǵanda, 28-29 naýryzda oblysta kún jylynýyna (jaýyn-shashyn da bolýy yqtımal) baılanysty qar tez erip, jazyq jerlermen sý aǵýy múmkin», dep habarlady TJ departamenti.
Eske sala keteıik, budan buryn Batys Qazaqstanda sý shaıyp ketken oblystyq jol jabylǵanyn jazǵan bolatynbyz.
TJ departamentiniń naqtylaýynsha, Bókeı ordasy Bısen aýylynan 18 shaqyrym jerde sý shaıyp ketken jolda qozǵalys keıin qalpyna keltirildi.
