Oralda birneshe baǵyttaǵy avtobýstyń qozǵalysy toqtatyldy
ORAL. QazAqparat – Oralda 4 maýsymnan bastap birneshe baǵyttaǵy avtobýstyń qozǵalysy toqtatyldy, dep habarlaıdy QazAqparat tilshisi.
Oral qalasy jolaýshylar kóligi jáne avtomobıl joldary bólimi jolaýshylar kóligi sektorynyń meńgerýshisi Almaz Ahoshevtiń aıtýynsha, №3 Melovye gorkı – Plodoovoşnoı, №35 Jaıyq ózeni jaǵalaýy – D.Qonaev shaǵynaýdany jáne №10 Bazar – Podhoz baǵyttarynda qatynaıtyn avtobýstarda sanıtarlyq talaptar saqtalmaǵan.
Atalǵan avtobýstarda júrgizýshiler men kondýktorlar betperde men qolǵap kımeı jumys istegen. Avtobýs salondaryn dezınfektsııalaý jumystary júrgizilmegen.
Sondaı-aq jolaýshylar tarapynan da sanıtarlyq talapty saqtamaý jıi kezdesedi.
«Mundaı jumystar jalǵasady. Bólim mamandary avtobýstardyń sanıtarlyq talapqa sáıkestigin kún saıyn tekseredi. Eger bul talaptar saqtalmasa, basqa baǵyttaǵy avtobýstar qozǵalysyn da toqtatýǵa deıin tıisti sharalar qabyldanady», dedi QazAqparat tilshisine A.Ahoshev.
Eske sala keteıik, budan buryn Oralda koronavırýs qaterine baılanysty ortalyq saıabaqtyń qaıta jabylǵanyn jazǵan bolatynbyz.
Sondaı-aq búgin birqatar óńirdiń ákimdikterine sanıtarlyq-epıdemıologııalyq talaptardy kúsheıtý tapsyryldy.
Batys Qazaqstanda sońǵy tirkelgen 22 naýqastyń 16-sy – buryn koronavırýs juqtyrǵandarmen baılanysta bolǵandar. Al 6 adamnan profılaktıkalyq maqsatta synama alynǵan.
Osylaısha óńirde aýyrǵandar sany 754-ke jetip, sonyń 327-si jazylyp shyqty.
