Oralda birneshe adam sýǵa ketýden aman qaldy
ORAL. QazAqparat - Oralda ótken demalys kúnderi birneshe adam sýǵa ketýden aman qaldy, dep habarlaıdy «QazAqparat» tilshisi.
Qala turǵyny Rýslan Qısambaevtyń málim etkenindeı, 5 tamyz kúni shamamen saǵat 20.45-te Oralǵa qarasty Komıntern aýylyndaǵy Jaıyq ózeniniń jaǵalaýynda tosyn oqıǵa boldy. Ózin Naýryzbaı dep ataǵan L010BA avtokóliginiń júrgizýshisi eki-úsh mınýttyń ishinde qatty aǵyspen alysa júrip, sýǵa ketip bara jatqan Bıbigúl esimdi qyzdy qutqaryp qaldy. Jaǵalaýǵa shyǵaryp, alǵashqy kómegin kórsetti. Qyz esin jıǵannan keıin qurbylarymen birge ketti. Jaǵajaıdaǵy jurt Naýryzbaıdyń erligi úshin alǵysyn jaýdyrdy. Bul kezde jaǵajaıda qutqarýshylar bolǵan joq.
BQO TJ departamenti jedel qutqarý jasaǵy bastyǵynyń jedel jumystar jónindegi orynbasary Rashıd Nurǵalıevtiń aıtýynsha, Komınterndegi jaǵajaıda arnaıy beket joq, onda eriktiler jumys jasap, tosyn oqıǵa bolsa habarlaıdy. Qalada burynǵy «Metallıst» zaýyty aýdanynda, qalalyq mádenıet jáne demalys saıabaǵynda, Stella mańynda ǵana beket bar. 6 tamyz kúni saǵat 17.45 shamasynda «Samal-3» shaǵynaýdany mańynda eki bala Shaǵan ózenine ketip qala jazdady. 2005 jáne 2008 jylǵy eki balany qutqarýshylar aman alyp qaldy.
Sýǵa túsý maýsymy bastalǵannan beri barlyǵy 18 adam qutqarylsa, sonyń 9-y - balalar. Ókinishke qaraı, 4 adam sýǵa ketse, sonyń úsheýi kámeletke tolmaǵandar bolyp otyr.
Aıta keteıik, óńirde sońǵy kúnderi kún qatty ysyp tur.
