Oralda bir kúnde qos birdeı arnaıy tehnıka órtendi
ORAL. QazAqparat – Oral qalasynda bir kúnde qos birdeı arnaıy tehnıka órtendi, dep habarlaıdy QazAqparat tilshisi.
BQO TJ departamentiniń baspasóz qyzmetinen túsken málimetke qaraǵanda, 20 qarasha kúni saǵat 13.56-da Zachagan kentindegi «Oral» podstansasy aýdanynda ZIL-131 avtokóliginiń órtengeni jóninde habar kelgen.
Órt saǵat 14.07-de oqshaýlanyp, 14.44-te sóndirildi. Oǵan 9 adam, 2 tehnıka jumyldyryldy.
Ekinshi oqıǵa saǵat 16.45-te qala ortalyǵyndaǵy Qurmanǵazy men M.Yqsanov kósheleriniń qıylysynda boldy. Bul joly GAZ-53 avtokóliginiń motor bóligi jandy. «Tilsiz jaý» saǵat 17.01-de aýyzdyqtaldy (órt sóndirýge 5 adam, 1 tehnıka qatysty).
Zardap shekkender joq.
Qazirgi kezde órtterdiń shyǵý sebebi, kináliler, keltirilgen shyǵyn anyqtalý ústinde.
Osylaısha jyl basynan beri BQO-da 92 avtokóliktiń otqa oranǵany tirkeldi.
Kýágerlerdiń sózine qaraǵanda, keshe órtengen arnaıy tehnıkalardyń birinshisi «Batys Qazaqstan elektr toraptaryn taratý kompanııasy» AQ-ǵa, ekinshisi «Batys sý arnasy» JShS-yna tıesili kórinedi.
