Oralda bir kúnde eki órt oqıǵasy tirkeldi
ORAL. QazAqparat - Keshe Oral qalasynda turǵyn úıde qos birdeı órt oqıǵasy tirkeldi, dep habarlaıdy «QazAqparat» tilshisi.
BQO TJ departamenti órt sóndirý jáne apattyq-qutqarý jumystary qyzmetinen alynǵan málimetke qaraǵanda, saǵat 18.20-da Muhıt kóshesi 78/1 mekenjaıynda kóp qabatty úıdegi páterdiń janyp jatqany jóninde habar túsken. Órt sóndirýshiler kelip jetken mezgilde bes qabatty úıdiń birinshi qabatynda otqa oranǵan páterden aldymen kórshilerdiń 1958 jylǵy áıeldi es-tússiz kúıinde alyp shyqqany belgili boldy. Órt sóndirýshiler shuǵyl iske kirisip, oqıǵa ornynan 1957 jylǵy azamatty taýyp, ony jedel járdem brıgadasyna tapsyrdy. Joǵary qabattardaǵy páterlerden 30 adam (beseýi - bala) kóshirildi.
Saǵat 18.56-da órttiń beti qaıtyp, 19.52-de tolyqtaı sóndirildi. «Tilsiz jaýdy» aýyzdyqtaýǵa 13 adam, bes tehnıka jumyldyryldy. Órt saldarynan 1957 jylǵy er adam qaza taýyp, 1958 jylǵy áıel oblystyq klınıkalyq aýrýhanaǵa jatqyzyldy. Órt aýmaǵy 50 sharshy metrdi qurady.
Keshe sondaı-aq saǵat 21.20-da A.Matrosov kóshesi 170, 14-páterinde jeke zattardyń janyp jatqany jóninde habar túsken. Munda besinshi qabattaǵy páter janǵan. 18 adam (tórteýi - bala) kóshirildi. 4 sharshy metr aýmaqty qamtyǵan órt saǵat 21.59-da sóndirildi. 12 adam, 4 tehnıka jumyldyrylǵan bul órtten eshkim zardap shekken joq.
Qazirgi kezde órtterdiń shyǵý sebepteri, keltirilgen shyǵyn, kináli adamdar anyqtalýda.
Aıta keteıik, Oral qalalyq TJ basqarmasynan alynǵan málimetke qaraǵanda, bıylǵy toǵyz aıda shahar aýmaǵynda 206 órt tirkelse, sonyń 114-i turǵyn úıde bolǵan. Órt saldarynan 4 adam kóz jumyp, 9-y túrli jaraqat alǵan edi.
