Oralda bir kúnde eki kóp qabatty úı paıdalanýǵa berildi
ORAL. QazAqparat - Jańa jyl merekesi qarsańynda oblys ortalyǵynda qos birdeı kóp qabatty úı paıdalanýǵa berilip, qonys ıelerine páter kiltterin oblys ákimi Altaı Kólginov tabys etti, dep habarlaıdy «QazAqparat» HAA tilshisi.
Zashaǵan kentindegi «Kóktem» shaǵynaýdanynda 500 páterlik, bes qabatty turǵyn úı kesheni boı kóterdi. Ony «Marasant» JShS bir jylda salyp bitirdi. Páterlerdiń jalpy alańy - 24 911,8 sharshy metr.
Sol sekildi D.Qonaev atyndaǵy shaǵynaýdanda 171 páterlik toǵyz qabatty úı de iske qosyldy. Bul ǵımarattyń merdigeri «SV plıýs» JShS qurylys jumystaryn 2014 jyldyń qarashasynda bastaǵan bolatyn. Páterlerdiń jalpy alańy - 10 449,18 sharshy metr.
Qos turǵyn úı de «Nurly jol» baǵdarlamasy aıasynda «Qazaqstan ıpotekalyq kompanııasy» ıpotekalyq uıymy» AQ-nyń tapsyrysyna sáıkes salyndy. Páterler jergilikti atqarýshy organdarda sanattar boıynsha turǵyn úı kezeginde turǵandarǵa keıin satyp alý quqyǵymen atalmysh AQ-nyń baǵdarlamasy boıynsha jalǵa beriledi.
Turǵyndardyń qýanyshyna ortaqtasyp, merdiger kompanııalarǵa alǵysyn bildirgen óńir basshysynyń atap ótkenindeı, QR Táýelsizdiginiń 25 jyldyǵy toılanǵan jylda oblysta barlyǵy 1500 páter paıdalanýǵa berilip otyr. Munyń bári - Elbasynyń, memlekettiń qoldaýynyń arqasy. «Nurly jol» baǵdarlamasy halyqty turǵyn úımen qamtýdy, jol salyp, ınfraqurylym tartýdy, sáýletti nysandar turǵyzyp, qala men eldi mekenderdi abattandyrýdy, jańa jumys oryndaryn ashýdy kózdeıdi. Búgin bir kúnniń ishinde 670 páter óz ıelerin tapty. Jańa baspanalar alty sanat boıynsha kezekte turǵandarǵa berildi. Olardyń arasynda kóp balaly otbasylar, jalǵyzbasty analar, múmkindigi shekteýli balalardy tárbıelep otyrǵandar jáne basqalar bar. 
Altaı Kólginov birqatar jańa páterlerde bolyp, turǵyndarǵa «qutty bolsyn» aıtyp, kórimdigin berdi.
Aıta keteıik, oblystyq qurylys basqarmasynan túsken málimetke qaraǵanda, bıylǵy on bir aıda barlyq qarjylandyrý kózderinen 234,3 myń sharshy metr turǵyn úı iske qosyldy, bul ótken jylǵydan 16 paıyzǵa artyq. Kelesi jyly jeti kóppáterlik turǵyn úı qurylysy jalǵasady.
