Oralda bir kúnde eki avtokólik órtenip ketti
ORAL. QazAqparat – Oral qalasynda bir kúnde eki avtokólik órtenip ketti, dep habarlaıdy QazAqparat tilshisi.
BQO TJ departamentiniń baspasóz qyzmetinen túsken málimetke qaraǵanda, oqıǵa 13 qyrkúıek kúni oryn aldy.
Aldymen saǵat 16.47-de «Úmit» shaǵynaýdanyndaǵy M.Áýezov kóshesi 20-mekenjaıynda «VAZ-2109» avtokóliginiń janyp jatqany jóninde habar túsken.
Júrip kele jatqan kóliktiń motor bóligi otqa oranǵan.
Sol kúni saǵat 20.48-de Oral-Býzýlýk tas jolynda Novenkıı aýylyna qaraı burylar tusta «Folksvagen Passat» avtokóligi órtengen. Onyń da motor bóligi janǵan.
Qos órtti de sóndirýge 6 adam, 1 tehnıka bardy.
Zardap shekkender joq.
Batys Qazaqstan oblysynda osymen jyl basynan beri 72 avtokólik órtendi.
Eske sala keteıik, budan buryn Oralda qos avtokólik soqtysyǵyp, bireýi órtengenin, al Aqjaıyq aýdanyndaǵy jol apatynan bes adamnyń qaza tapqanyn jazǵan bolatynbyz.
