Oralda bir kúnde 100-den astam polıtsııa qyzmetkeri ekpe saldyrdy
ORAL. QazAqparat – Oral qalasynda bir kúnde 100-den astam polıtsııa qyzmetkeri ekpe saldyrdy, dep habarlaıdy QazAqparat tilshisi.
BQO polıtsııa departamentiniń resmı ókili Bolatbek Belgibekovtiń málim etkenindeı, olardyń bári de 3 sáýir kúni №3 emhanaǵa óz erikterimen koronavırýsqa qarsy vaktsına qabyldady.
Onyń sózine qaraǵanda, ekpe saldyrǵandardyń ishinde departament basshylyǵy, ózi de boldy.
«Bul, birinshiden, árkimniń ózi úshin qajet. Ekinshiden, halyqpen tyǵyz baılanysta jumys jasaıtyndyqtan, bizge mindetti túrde kerek. Polıtseılerdiń pandemııamen kúreste medıtsına qyzmetkerlerimen qatar aldyńǵy shepte júretini belgili. Sol sebepti indettiń taralýyna ózimiz jol bermeýimiz qajet. Ózimdi ekpege deıin de, keıin de jaqsy sezindim. Eshbir aýytqý baıqalmady. Sondyqtan áriptesterim men jerlesterimdi óz densaýlyǵymyz úshin indetke qarsy ekpe alýǵa shaqyramyn», dedi QazAqparat tilshisine Bolatbek Belgibekov.
Oblystyq densaýlyq saqtaý basqarmasynyń baspasóz qyzmetinen túsken málimetke qaraǵanda, 2 sáýir kúni óńirge 10 800 doza «Spýtnık V» vaktsınasy jetkizildi. Sonyń 4900-i – birinshi, 5 900-i – ekinshi komponent.
Oblysta vaktsınatsııalaý kezeń-kezeńmen, keste boıynsha júrgizilýde.
Eske sala keteıik, budan buryn polıtseıdiń otbasyn oılaǵandyqtan da ekpe saldyrǵanyn jazǵan bolatynbyz. Sondaı-aq muǵalim indetti juqtyrmaýdyń bir joly jappaı ekpe alý ekenin jetkizdi.
