Oralda bir bala men eki kelinshekti aıýandyqpen óltirgen jigit tutqyndaldy
ASTANA. QazAqparat - Oral qalalyq sotynda sýdıa Raýshan Ysmaılova eki kelinshek pen kishkentaı balany jaýyzdyqpen óltirgen kúdiktini tutqyndaý týraly úkim shyǵardy, dep jazady Oral aptalyǵy.
Úsh adamnyń ólimine kúdikti Ádilet Qamalov - Jympıty aýylynyń 23 jastaǵy turǵyny. Tergeý amaldary kezinde ol ýaqytsha oqshaýlaǵyshta bolady.
«Kúdikti kinásin moıyndady. Onyń ústine aldyn ala tergeý sharalary onyń bul iske tikeleı qatysy bar ekenin kórsetti», - dedi qala prokýrorynyń kómekshisi Marat Ishanov.
Qamalov buǵan deıin urlyq jasaǵany úshin isti bolǵan. Balalary bar. Qazirgi ýaqytta birqatar sot saraptamalary taǵaıyndaldy. Kúdiktiniń aıtýynsha, ol qylmys jasamas buryn spırttik ishimdik ishken.
«Qamalov ózi óltirgen adamdarmen jaqsy tanys bolǵan jáne olardyń úılerine jıi kelip turǵan», - dedi Işanov.
Kinásin moıyndaǵan kúdiktiniń sózine qaraǵanda, ol áýeli ózimen birge turǵysy kelmegen kelinshektiń qurbysyn pyshaqtap óltirgen. Keıin onyń 2014 jylǵy balasynyń jáne áıeldiń óziniń janyn qıǵan. Olardyń árqaısysysyna 18-den astam ret pyshaq jumsaǵan.
Qandy oqıǵa 5 qyrkúıekke qaraǵan túni saǵat 02.00 men 04.00 arasynda bolǵan. Sodan keıin qylmystyń izin jasyrý pıǵylymen úıdi órtegen. Atalǵan derek boıynsha QR QK 99-baby 2-bóligine sáıkes (eki jáne odan kóp adamdy qasaqana óltirý) qylmystyq is qozǵalyp, tergeý amaldary júrgizilýde. Kúdikti bul bap boıynsha 15-ten 20 jylǵa deıin bas bostandyǵynan aıyrylýy múmkin.
