Oralda bir aılyq mólsherdegi qar tústi
Oral qalasy turǵyn úı-kommýnaldyq sharýashylyǵy jáne turǵyn úı ınspektsııasy bóliminiń basshysy Jandos Dúısenǵalıevtiń málim etkenindeı, ótken demalys kúnderindegi aýa raıynyń qolaısyzdyǵynan (boran men qar) 2 myńnan astam abonent elektr jaryǵynsyz qaldy.
Onyń sózine qaraǵanda, 25-26 jeltoqsan kúnderi elektr jelilerindegi apattar boıynsha 100-den astam ótinim tústi.
Jaýǵan qardyń kóptiginen negizinen áýe jelileri úzildi. «Qurylysshy», «Kýrenı» shaǵynaýdandary men Zachagan kentinde 8 brıgada 10 tehnıkamen jumys jasady.
Qar tazartý jumystaryna 115 avtotehnıka, 250 jumysshy jumyldyryldy. Bir jarym táýlik ishinde qaladan 10 myń tekshe metr, al qar jaýý bastalǵannan beri barlyǵy 25 150 tekshe metr qar shyǵaryldy.
Qalada bir kúnde bir aılyq mólsherdegi qar túsip, bıiktigi 15 santımetrge jetti.
Qar tazartý jumystary odan ári jalǵasýda.
«Oǵan qosa ótken demalys kúnderi qalanyń birneshe aýdanynda 15 700 abonent sýsyz qaldy. Jóndeý jumystary nátıjesinde sý berý tez qalpyna keltirildi», dedi J.Dúısenǵalıev.
Eske sala keteıik, budan buryn BQO-da boranǵa baılanysty taǵy bir respýblıkalyq joldyń jabylǵanyn, qatty jelden kolledj ǵımaratynyń shatyry ushyp ketkenin, mádenıet úıiniń shatyry qulaǵanyn jazǵan bolatynbyz.
Sondaı-aq Batys Qazaqstanda 20-dan astam avtokólik qar qursaýynda qaldy.