Oralda bilim salasynyń ozyq qyzmetkerleri marapattaldy
ORAL. QazAqparat - Batys Qazaqstan oblystyq qazaq drama teatrynda QR Táýelsizdiginiń 25 jyldyǵyna arnalǵan óńirdegi bilim salasy qyzmetkerleriniń saltanatty jıyny boldy, dep habarlaıdy QazAqparat tilshisi.
Oǵan qatysqan oblys ákiminiń orynbasary Marat Toqjanovtyń atap ótkenindeı, Elbasynyń basshylyǵymen Qazaqstan táýelsizdik jyldarynda bilim salasynda da kóptegen tabystarǵa qol jetkizdi. Bilim salasy basym baǵyttardyń biri retinde memleket tarapynan udaıy kóńil bólinip keledi. Nursultan Nazarbaevtyń bastamasymen «Bolashaq» halyqaralyq baǵdarlamasy qolǵa alynyp, Nazarbaev ýnıversıteti men zııatkerlik mektepteri iske qosyldy. Jyl saıyn jańa bilim nysandary boı kóterýde. Bıyl Oralda eki mekteptiń qurylysy bastalsa, aldaǵy jyly oblysta taǵy ekeýi salynbaq. Bul maqsatqa 4,3 mlrd. teńge bólindi. Qazirgi tańda el erteńi - jetkinshek urpaqqa osy zamanǵy óskeleń talaptarǵa sáıkes sapaly bilim berýde sala qyzmetkerlerine úlken jaýapkershilik júktelip otyr.
Shara barysynda sala úzdikteri men ardagerleri túrli marapattarǵa ıe boldy. Mysaly, Jańaqala mektep-gımnazııasy dırektorynyń oqý isi jónindegi orynbasary Raıa Apaqaeva QR bilim berý isiniń qurmetti qyzmetkeri atansa, Oraldaǵy daryndy balalarǵa arnalǵan mamandandyrylǵan S.Seıfýllın atyndaǵy №11 oblystyq mektep-ınternaty kesheni qazaq tili men ádebıeti pániniń muǵalimi Shara Tileýjanova men Terekti aýdany «Úmit» tilder gımnazııasy bıologııa pániniń muǵalimi Alısa Ábdirahmanova Y.Altynsarın tósbelgisin ıelendi. Bir top qyzmetker «Bilim qyzmetkerleriniń kásipodaǵyna sińirgen eńbegi úshin» tósbelgisimen marapattalsa, birqatary «Úzdik pedagog», «Táýelsizdik qurdastary», «Úzdik kásipodaq jetekshisi» atalymdaryn ıelendi. 15 ardagerge «Aqjaıyq» shıpajaıyna joldama tabys etildi.
«Táýelsizdik meıramy qarsańynda eńbegimizdiń elengeni úshin qýanyshtymyz. Men Oraldaǵy qara shańyraq sanalatyn S.Seıfýllın atyndaǵy №11 mektepte keńes dáýirinen beri ustazdyq etip kelemin. Buǵan deıin de oblys ákiminiń grantyn ıelenip, mereıim ósken bolatyn. Onyń ústine elge belgili ǵalym, professor, fılologııa ǵylymdarynyń doktory Mátjan Tileýjanovtyń kelini retinde qazaq tiliniń týyn kóterip, mártebesin asyrýǵa úles qosýdamyn. Eń bastysy, táýelsizdigimiz qutty, elimizdiń irgesi myqty bolsyn», dedi QazAqparat tilshisine Shara Tileýjanova.
