Oralda beınebaqylaý kamerasynyń kómegimen kisi tonaý qylmysy ashyldy
ORAL. QazAqparat - 29 maýsym kúni tús kezinde belgisiz eki jigit Ábilqaıyr han kóshesi boıyndaǵy 101-úıiniń janynda 1988 jylǵy M. degen qyzdyń moınynan kýlony bar altyn alqasyn julyp alyp, boı tasalaǵan, dep habarlaıdy «QazAqparat» tilshisi.
BQO ІІD jergilikti polıtsııa qyzmetinen túsken málimetke qaraǵanda, sol mańda ornatylǵan beınebaqylaý kamerasynyń kómegimen kúdiktiler týraly dál málimetter barlyq jeke quramǵa ýaqtyly berildi. Sonyń nátıjesinde qylmystyń izi sýymastan, kisi tonaýshylar qolǵa tústi.
Qazirgi kezle Oral qalasynda beınebaqylaý kameralarynyń kóbeıýi kóshe qylmysyn ashýǵa eleýli túrde septigin tıgizýde.
Aıta keteıik, bıylǵy alty aıda oblysta tonaý qylmysy 231-den 174-ke deıin nemese 24,7 paıyzǵa azaıdy. Esesine ashý kórsetkishi 72,6-dan 86,9 paıyzǵa deıin artty. Sol sekildi buzaqylyq 274-ten 196-ǵa deıin tómendep, ashylý deńgeıi 80,3-ten 87 paıyzǵa deıin kóterildi.
