Oralda beıbit jıynǵa shyqqandar ýnıversıtet dekanynyń qyzmetten ketýin talap etti

ORAL. KAZINFORM – «Jańa adamdar» jastar qozǵalysynyń ókilderi Qurmanǵazy men Dına eskertkishiniń aldyna jınalyp, M.Ótemisov atyndaǵy Batys Qazaqstan ýnıversıteti jaratylystaný-geografııa fakýltetiniń dekany Aqan Turǵymbaevtyń qyzmetinen ketýin talap etti. 

Áleýmettik jelide taralǵan beınejazbada stýdent Syrym Táńirbergenov atalmysh qozǵalystyń is-sharasyna barǵany úshin A.Turǵymbaevtyń ózderin oqýdan shyǵaratynyn aıtyp, qorqytqanyn jetkizdi.

– Onyń ádisteri – bizdi qorqytý jáne bopsalaý. Mundaı bolmaýy qajet. Turǵynbaev jumystan shyqsyn! – dedi ol.

Stýdenttiń bul sózin jınalǵandar qaıtalady.

M.Ótemisov atyndaǵy Batys Qazaqstan ýnıversıtetiniń baspasóz qyzmetinen málim etkenindeı, 2 jeltoqsan kúni saǵat 14.30 shamasynda JOO ákimshilik ǵımaratynyń aldynda ornalasqan Qurmanǵazy men Dına eskertkishi janynda 40-qa jýyq jastardyń qatysýymen zańsyz jıyn ótken. Aktsııanyń «Jańa adamdar» qoǵamdyq birlestiginiń jetekshileri Ásel Bádenova men Meıirjan Ǵarıfollaevtyń bastamasymen uıymdastyrylǵany anyqtaldy.

– Zańsyz jıynǵa qatysýshylar arasynda M. Ótemisov atyndaǵy BQÝ stýdenti de bolǵan. Ol uıymda óziniń zańsyz oqýdan shyǵarylatyny týraly jalǵan aqparat taratqan. Stýdenttiń oqý úlgerimi men sabaqtarǵa qatysý deńgeıi tómen ekeni belgili. Sonymen qatar, ol birneshe ret jataqhanada tártip buzǵany, tazalyq talaptaryn saqtamaǵany jáne sebepsiz sabaqqa kelmegeni úshin eskertý alǵan. Bul stýdenttiń ýnıversıtet jarǵysy men tártip erejelerin birneshe ret buzǵanyn kórsetedi. Fakýltet dekany A.Turǵymbaev stýdentpen túsindirý jumystaryn júrgizip, onyń áreketteri saldaryn, sonyń ishinde oqýdan shyǵarylýy múmkindigi týraly eskertken. Qazirgi ýaqytta onyń oqýdan shyǵarylýy týraly buıryq tirkelgen joq, – dep habarlady vedomstvodan. 

Oral qalasy ishki saıasat bóliminiń basshysy Azamat Ǵınııatov atalmysh beıbit jıyn boıynsha jergilikti atqarýshy organǵa uıymdastyrýshy taraptan habarlama berilmegenin jetkizdi. Sol sebepti uıymdastyrýshylarǵa zań aıasynda túsinikteme jumystary júrgizilgen.

– Jıynǵa qatysýshylarmen zańnamany buzýǵa jol bermeý týraly profılaktıkalyq áńgime júrgizildi. Sodan keıin jınalǵandar tarap ketti, – dep naqtylady BQO polıtsııa departamentiniń baspasóz qyzmeti.

Eske sala keteıik, budan buryn Oralda mas kúıinde aıaldamanyń terezesin syndyrǵan er adamnyń ustalǵanyn jazǵan bolatynbyz.