Oralda besinshi qabattan sekirgen adam aman qaldy
ORAL. QazAqparat - Keshe keshkisin er adam kóp qabatty úıdiń terezesin syndyryp, sekirip ketti, dep habarlaıdy «QazAqparat» tilshisi.
Oral qalalyq ishki ister basqarmasy bastyǵynyń birinshi orynbasary Nurlan Bısenovtiń aıtýynsha, 1986 jylǵy er adam Eýrazııa dańǵyly 89-mekenjaıynda ornalasqan «Gaýhar» jataqhanasynyń 5 qabatynan sekirip, «Stroı Dom» qurylys dúkeniniń tóbesine túsken. Sodan ol oblystyq aýrýhanaǵa jetkizilgen.
Oblystyq densaýlyq saqtaý basqarmasynyń baspasóz hatshysy Salamat Eralınniń sózine qaraǵanda, er adam túnde oblystyq aýrýhananyń jansaqtaý bólimine túsken kezde mas kúıinde bolǵan. Jaǵdaıy aýyr, biraq aıtqandy túsinedi. Oń jambasy synǵan, búıregine zaqym kelgen.
Qazirgi kezde oqıǵanyń jaı-japsary anyqtalý ústinde.
