Oralda «Bes urpaq» saýyqtyrý saıabaǵy ashyldy
ORAL. QazAqparat – Oralda qazaq jáne káris halyqtary dostyǵynyń aıǵaǵy retinde «Bes urpaq» saýyqtyrý saıabaǵy ashyldy, dep habarlaıdy QazAqparat tilshisi.
Elorda kúnine oraılastyrylǵan rásimge qatysqan oblys ákiminiń orynbasary Serik Egizbaev saıabaqty iske qosqan BQO QHA káris mádenı-aǵartý birlestigine alǵysyn bildirdi.
Saıabaqtyń ashylý rásimine sondaı-aq qala ákimi Abat Shynybekov qatysty.
Káris ultynyń ókilderi Qazaqstanǵa 1937 jyly deportatsııalanǵany belgili.
Káris mádenı-aǵartý birlestiginiń tóraǵasy Vıtalıı Annyń aıtýynsha, saıabaqtyń «Bes urpaq» atalýynyń erekshe máni bar. 1937 jyldan beri Qazaqstanda káristerdiń bes urpaq ókilderi ósip jetildi. Qazirgi tańda elimizde 100 myńdaı káris ultynyń ókilderi bolsa, sonyń bir myńdaıy Batys Qazaqstan oblysynda ómir súrip keledi.
Saıabaqtyń taǵy bir ereksheligi, mundaǵy shyǵys medıtsınasyna negizdelgen «Densaýlyq jolymen» jaıaý júrýge bolady.
«Budan buryn Oralda «Qazaq halqyna myń alǵys!» monýmenti ashylǵan bolatyn. Bul – qalaǵa ekinshi tartýymyz. Aldaǵy ýaqytta da Qazaqstan halqy yntymaq-birlikte bolyp, elimizdiń qarqyndy damı berýine tilekshimiz», dedi V.An.
Eske sala keteıik, budan buryn Oralda «Qazaq halqyna myń alǵys!» atty monýment ashylǵanyn jazǵan bolatynbyz.
