Oralda belgisiz bireýler úsh birdeı avtokólikke ot qoıdy
ORAL. QazAqparat - Oralda belgisiz bireýler úsh birdeı avtokólikke ot qoıǵan, dep habarlaıdy QazAqparat tilshisi.
Oblystyq TJ departamentiniń baspasóz qyzmetinen túsken málimetke qaraǵanda, oqıǵa búgin tańerteń Muhıt kóshesi boıyndaǵy bes qabatty 78/1-úı mańynda oryn alǵan.
Saǵat 06-33-te «Toıota Korolla» avtokóliginiń salony men artqy bóligi jáne «GAZel» avtokóliginiń artqy bóligi órtengen. Órt 06.50-de oqshaýlanyp, 07.05-te aýyzdyqtalǵan. Jalyndy sóndirýge 7 adam, 1 tehnıka jumyldyryldy.
Zardap shekkender joq.
Órttiń shyǵý sebepteri, kináli adamdar, keltirilgen shyǵyn anyqtalý ústinde.
Turǵyndardyń sózine qaraǵanda, taǵy bir «GAZel» avtokóligin órtten ıesi aman alyp qalǵan. Al «Toıota Korolla» kóligi túgelge jýyq janyp ketken deýge bolady.
Oblystyq ishki ister departamenti jergilikti polıtsııa qyzmetiniń bastyǵy, polıtsııa polkovnıgi Manarbek Ǵabdýllınniń aıtýynsha, qazirgi kezde osy oqıǵa boıynsha tergeý amaldary júrgizilýde. Beınekameranyń kómegimen kúdiktiler izdestirilip jatyr.
