Oralda belgisiz bireýler aqsha aıyrbastaý pýnktin tonamaq bolǵan
ORAL. QazAqparat - Oralda aqsha aıyrbastaý pýnktin tonamaq bolǵan top ustaldy, dep habarlaıdy «QazAqparat» tilshisi.
Oral qalalyq ishki ister basqarmasynyń baspasóz qyzmetinen túsken málimetke qaraǵanda, 4 aqpan kúni tańǵy saǵat 05.05 shamasynda belgisiz bireýler Jýkov kóshesindegi aqsha aıyrbastaý pýnktine kelip, terezeni gantelmen uryp, syndyrmaq bolǵan. Alaıda 39 ret ursa da, syndyra almaǵan soń, ketip qalady. Tonaýshynyń barlyq is-áreketi, kıimderi beınetaspada jazylyp qalǵan.
Jedel izdestirý sharalary barysynda 1993 jylǵy eki turǵyn ustalyp, olar ýaqytsha oqshaýlaý ızolıatoryna qamaldy. Gantel, qysqy kúrte men bas kıim tárkilendi.
Qazirgi kezde QR QK 191-baby 1-bóligine sáıkes qylmystyq is qozǵalyp, tergeý amaldary júrgizilýde.
Osy shara barysynda kúdiktiniń biri munyń aldynda aqsha aıyrbastaý pýnktine qaraqshylyq shabýyl jasap, tonaǵany anyqtaldy. Bul oqıǵa ótken jyldyń 7 jeltoqsany kúni bolǵan. Tańǵy saǵat 04.20-da Eýrazııa dańǵyly boıynda ornalasqan aqsha aıyrbastaý pýnktiniń terezesin balǵamen uryp, syndyryp, ishke kirgen. Osyndaǵy jas qyzmetkerdiń moınynan qysyp, qorqytyp, aqsha taýyp berýin talap etedi. Balǵa men pyshaqty kórgen áıel kassadaǵy 130 myń teńgeni sýyryp beredi. Aqshany qaltasyna basqan kúdikti balǵany laqtyryp ketedi.
Osylaısha, aqsha aıyrbastaý pýnktin tonap, dánikken qaraqshy bul joly qasyna taǵy bireýdi ertip alǵan bolyp shyqty.
