Oralda belgili jyrshy-termeshi Almas Almatov óner kórsetti
ORAL. QazAqparat - Qadyr Myrza Álı atyndaǵy mádenıet jáne óner ortalyǵynda belgili jyrshy-termeshi, Qazaqstannyń eńbek sińirgen qaıratkeri Almas Almatov óner kórsetti, dep habarlaıdy QazAqparat.
Qadyr ortalyǵynan túsken málimetke qaraǵanda, saıyn dalanyń sahara tósinde qyzyl tili kómekeıin kúıdirgen sóz ustalary az bolmaǵan. Solardyń biri de biregeıi, Syr súleıleriniń sarqyty, erteden shapsa keshke ozǵan, yldıdan salsa tóske ozǵan jyraý úsh saǵat kósile shapty. Kórermen tapjylǵan joq, uıyp tyńdady. Qara dombyrany qolǵa alyp, arǵy-bergi tarıhtan tolǵanyp, almastaı jarqyldaǵan jyrlarymen sózdiń qunyn túsinetin Jaıyq jurtshylyǵynyń janyn jadyratyp, kóńilin kóterip tastady.
Syr óńirinen shyǵyp, shyǵystyń áıgili Ferdoýsıiniń «Shahnamasyn» qazaqsha sóıletken Turmaǵanbet Іztileýulynyń týyndylarynan bastap, jyraý biraz jyr-dastandardan úzindi keltirip otyrdy. «Kóruǵly» dastanynyń qysqasha tarıhyn aýyzdyń sýyn aǵyzatyndaı qylyp, sózdiń maıyn tamyzyp turyp baıandap berdi.
Birtindep kelip óziniń shyǵarmashylyǵyna aýysyp, ári qaraı quıyndatyp áketti.
Alpys segiz saǵattyq jyrdy jatqa aıtyp, taspaǵa túsirgen jalqy jyraý keshin:
Qulaqtyń qaryny joq toıatuǵyn,
Malym joq bas-basyńa soıatuǵyn.
Al, endi, aǵaıyndar, qosh bolyńyz,
Osymen kez de keldi qoıatuǵyn.
Eldiń júgin artatyn nar bolyńdar,
Árqaısyń alasarmas taý bolyńdar,
Qaıteıin, qımaǵanmen amalym joq,
Ordaly azamattar, saý bolyńdar, - dep túıindedi.
Kesh sońynda ortalyq dırektory Baýyrjan Halıolla Aq Jaıyq eli atynan Almas Almatovqa alǵyshat tabystady. Al jyrshy Qadyr ortalyǵyna árqaısysy 15 myń joldan turatyn qos tomdyq «Shyńǵysnama» kitabynyń alǵashqy tomyn syıǵa tartty. Belgili ǵalym Qazybaı Bozymov mártebeli meımannyń ıyǵyna shapan jaýyp, astyna at mingizdi.
