Oralda belgili pıanıst Saıda Qalyqova shyǵarmashylyq kontsertin ótkizdi
ORAL. QazAqparat - Oralda belgili pıanıst, halyqaralyq konkýrstardyń laýreaty, mýzyka akademıgi, «Janshýaq» syılyǵynyń ıegeri, «Qazaqstannyń 100 jańa esimi» jobasynyń jeńimpazy Saıda Qalyqova jeke shyǵarmashylyq kontsertin qoıdy, dep habarlaıdy QazAqparat tilshisi.
Qazirgi tańda Astana qalasy memlekettik akademııalyq fılarmonııasynda qyzmet atqaratyn Saıda Qalyqovanyń A.Ostrovskıı atyndaǵy oblystyq orys drama teatrynda ótken «Asyl qalam» atty keshine halyq kóp jınaldy.
Kontsertti oblys ákimi Altaı Kólginov te tamashalady.
Qos janarynan aıyrylsa da, mýzyka salasynda tynbaı eńbek etip kele jatqan erekshe daryn ıesi kontsert barysynda Lıýdvıg van Bethovenniń áıgili №10 sonatasy, Frederık Shopenniń «Besik jyry» fantazııa-ekspromty, frantsýz kompozıtory Klod Debıýssıdiń «Aı sáýlesi», Aleksandr Alıabevtiń «Bulbuly» syndy klassıkalyq shyǵarmalardy ádettegideı notasyz oryndady. Sonymen qatar S.Qalyqova bul joly kompozıtorlyq qyrymen de tanyldy. «Mıraj» jáne «Samuryq qus» atty týyndylaryn oraldyq fleıta sheberi, mádenıet salasynyń úzdigi Vladımır Baıandınmen birge kópshilik nazaryna usyndy. Onyń «Týǵan jerim», «Kóldegi tań», Italııa eli men sondaǵy jora-joldastaryna arnaǵan «Noktıýrn» shyǵarmalary da kórermender kóńilinen shyqty.
Eline, týǵan jerine kelgen Saıda birneshe mekeme-uıymda bolyp, jerlesterimen kezdesý de ótkizdi.
Aıta keteıik, Oral qalasynda týyp-ósken Saıda Qalyqova toǵyz jasynda qos janarynan aıyrylsa da, mýzykany janyna serik etti. 13 jasynda týǵan qalasynda tuńǵysh shyǵarmashylyq kontsertin qoıǵan jas daryn Oraldaǵy Qurmanǵazy atyndaǵy mýzyka kolledjin, Astanadaǵy Qazaq ulttyq óner ýnıversıtetin fortepıano klasy boıynsha úzdik támamdady. Keıin «Bolashaq» baǵdarlamasy arqyly Italııanyń Lýıdjı Kerýbını atyndaǵy konservatorııasynda bilim aldy. Saıdaǵa anasy Sáýııa Jaıymqyzy únemi qasynda bolyp, qoldaý kórsetip keledi.
S.Qalyqova - «Qazaqstannyń 100 jańa esimi» jobasynyń jeńimpazy atanǵan úsh batysqazaqstandyqtyń biri.
