Oralda belgili bapkerdi eske alýǵa arnalǵan týrnır ótti
ORAL. QazAqparat - Oral qalasynda grek-rım kúresinen 2001-2003 jylǵy jasóspirimder arasynda Qazaqstannyń eńbek sińirgen jattyqtyrýshysy Murat Jumashevti eske alýǵa arnalǵan respýblıkalyq týrnır márege jetti, dep habarlaıdy «QazAqparat» tilshisi.
Osymen úshinshi ret uıymdastyrylyp otyrǵan jarysqa Ońtústik Qazaqstan, Qyzylorda, Aqtóbe, Atyraý, Mańǵystaý jáne Batys Qazaqstan oblystarynan 250-ge jýyq sportshy qatysyp, baq synady.
Týrnırge meıman retinde M.Jumashevtiń uly, Qazaqstannyń eńbek sińirgen jattyqtyrýshysy, grek-rım kúresinen Qazaqstan jastar quramasynyń aǵa bapkeri Serik Jumashev arnaıy keldi.
Jarys qorytyndysynda salmaq dárejeleri boıynsha Arman Ivanov (35 kg, Aqtóbe), Jandarbek Elekenov (38 kg, Oral, sportqa daryndy balalarǵa arnalǵan mamandandyrylǵan mektep-ınternaty) Arman Seıtkárimov (42 kg, OQO), Danııar Zııahmetov (46 kg, BQO, Terekti aýdany), Shaqabas Musaev (50 kg), Omar Sataev (54 kg, ekeýi de OQO-dan), Dosjan Ótepqalıev (58 kg, Oral, sportqa daryndy balalarǵa arnalǵan mamandandyrylǵan mektep-ınternaty), Júsip Ábdýálıev, 63 kg, Aqtóbe), Ábdinázim Qarabaev (69 kg), Meıirbek Ábdýtalıpov (76 kg, ekeýi de OQO-dan), Jansur Hamıdýllın (+76 kg, Oral, sportqa daryndy balalarǵa arnalǵan mamandandyrylǵan mektep-ınternaty) chempıon atandy.
Aıta keteıik, bul týrnırde úshinshi orynǵa ilikkender sport sheberligine úmitker atanady.
«Murat Jumashev óńirimizde grek-rım kúresiniń taralýyna mol eńbek sińirip, kóptegen shákirtter tárbıeledi. Alǵashqylary qatarynda KSRO sport sheberi Qanat Ǵalıev, Murat Amandyqov, Saǵıdolla Ábishevti ataýǵa bolady. Sosyn óziniń uly Serik Jumashev, bizden keıin Jasulan Maqsotov, Almaz Salhaev, Aıbek Mardanovtar Qazaqstannyń sport sheberi atandy», dedi «QazAqparat» tilshisine kezinde Murat Jumashevtiń baýlýymen grek-rım kúresinen jastar arasynda álem chempıony atanǵan, qazir ózi de shákirt tárbıelep, BQO jasóspirimder quramasynyń aǵa bapkeri qyzmetin atqaryp júrgen Artýr Úmbetqalıev.
