Oralda bazarda 2 júk tıeýshi tóbelesip, bireýi jansaqtaý bólimine tústi
ORAL. QazAqparat – Oralda bazarda 2 júk tıeýshi tóbelesip, bireýi jansaqtaý bólimine tústi, dep habarlaıdy QazAqparat tilshisi.
BQO polıtsııa departamentiniń baspasóz qyzmeti málim etkendeı, oqıǵa 23 qańtar kúni ortalyq bazarda bolǵan.
Osynda júk tıeýshi bolyp isteıtin, buryn qylmystyq jaýapkershilikke tartylǵan 26 jastaǵy turǵyn 18 jastaǵy áriptesiniń jumys ornyna kelgen.
Sosyn jasymdy nege syılamaısyń dep tıisken. Ekeýiniń arasyndaǵy talas tóbeleske ulasyp, sonyń saldarynan 18 jastaǵy júk tıeýshi jábirlenýshige dene jaraqatyn salǵan.
26 jastaǵy júk tıeýshi qalalyq kópbeıindi aýrýhananyń jansaqtaý bólimine jatqyzylsa, ekinshisi ýaqytsha oqshaýlaý ızolıatoryna qamaldy.
Qazirgi kezde QR QK 24-99-babyna (adam óltirýge oqtalý) sáıkes Abaı polıtsııa bólimi sotqa deıingi tergeý amaldaryn júrgizýde.
Departament bastyǵy, polıtsııa general-maıory Maqsuthan Ablazımovtiń naqtylaýynsha, kúdikti jábirlenýshiniń keýde tusyna pyshaq suqqan.
Ótken aptada oblysta 22 aýyr qylmys jasalsa, sonyń 22-si (91,7 paıyzy) izi sýymaı ashyldy. Tek QR QK 188-babyna (urlyq) sáıkes tirkelgen eki derek ashylǵan joq.
Al jyl basynan beri oblysta barlyǵy 403 qylmys (ótken jyly osy merzimde – 488) oryn alsa, sonyń 259-y nemese 64,2 paıyzy ashyldy.
Sonyń ishinde 3 asa aýyr qylmys (ótken jyly – 7) túgeldeı áshkerelendi.
Sondaı-aq bıyl 65 aýyr qylmystyń 44-i nemese 67,7 paıyzy (ótken jyly osy merzimde 75 qylmystyń 28-i nemese 37,3 paıyzy) ashyldy.
Eske sala keteıik, budan buryn Oralda turǵyn úıdegi órt ornynan qarııanyń máıiti tabylǵanyn jazǵan bolatynbyz.
