Oralda báıgeden el chempıonatynyń sońǵy irikteý kezeńi máresine jetti
ORAL. KAZINFORM — Oral qalasynda báıgeden Qazaqstan chempıonatyna irikteýdiń toǵyzynshy kezeńiniń jeńimpazdary anyqtaldy.
Sharanyń ashylý rásiminde Oral qalasy ákiminiń mindetin atqarýshy Jandos Dúısenǵalıev pen respýblıkalyq «Báıge» federatsııasynyń birinshi vıtse-prezıdenti Murat Óserbaev jınalǵandarǵa izgi tilegin bildirip, at báıgesine qatysýshylarǵa sáttilik tiledi.
Bıylǵy kóktemgi sý tasqyny kezinde el atbegileri atynan batysqazaqstandyqtarǵa qarjylaı qoldaý uıymdastyrǵan Murat Óserbaev, Isenbaı Qaldamanov, Qýat Úsenov, Batqan Sabýrov, Aıdar Nurmuqanbetovke Oral qalasy ákimdiginiń alǵyshaty men BQO «Báıge» federatsııasynyń «Altyn tizgin» tósbelgisi tabys etildi.
Respýblıka óńirlerinen kelgen júzge jýyq sáıgúlik báıgeniń qunan, top, alaman jáne uly alaman túrleri boıynsha synǵa tústi.
Otyz qunannyń ishinen astanalyq atbegi Almaz Orazbaevtyń Islamnur Ertós taqymdaǵan «Baqtorysy» eshkimge des bermedi. Qostanaılyq Qadyrbek Toqmýrzınniń «Fantastıgi» men mańǵystaýlyq Asan Qadyrbaevtyń «Senorasy» máreden ekinshi, úshinshi bolyp ótti.
Top báıgege 17 tulpar qosylyp, jambyldyq Baqyt Іńkárbektiń «Buırajaly» (bapkeri — Aıdar Orazalıev, shabandozy — Shynybek Myrzahmet) aldyna at saldyrmady. Batysqazaqstandyq Adaı Mırbolattyń «Botaqarasy», astanalyq Almas Orazbaevtyń «Narqasqasy» ıelerine sáıkesinshe ekinshi, úshinshi júldeni syılady.
Jıyrma tórt shaqyrymdyq alaman báıgede 18 arǵymaqtyń ishinen birinshi oryn batysqazaqstandyq Madııar Qurmanǵalıdyń «Qazynasyna» (bapkeri Erkebulan Ázimǵalı, shabandozy — Aıdaraly Baǵjan) buıyrdy. Alamannyń ekinshi, úshinshi oryndaryn batysqazaqstandyq Adaı Mırbolattyń «Berikqarasy» men aqtóbelik Nysanbek Tilektesovtyń «Tastúlegi» ózara bólisti.
Báıgeniń sońǵy túri — 31 shaqyrymdyq uly alamanda qostanaılyq Qadyrbek Toqmýrzınniń «Tahmınasy» (shabandozy — Álınur Elamanov) ozdy. Mańǵystaýlyq Talǵat Jakeevtiń «Ulytaýy» ekinshi, batysqazaqstandyq Nurlan Muhtarovtyń «Asyltorysy» úshinshi bolyp keldi.
Jalpy, irikteýdiń ár kezeńinde alǵashqy bolyp kelgen bes júırikke júldemen qosa chempıonattyń fınalyna joldama berildi. Sol alǵashqy bestikke batysqazaqstandyq alty arǵymaq kirdi. Olar — top jáne alaman báıgede de ekinshi bolyp máre syzyǵyn kesken aqjaıyqtyq Adaı Mırbolattyń «Berikqarasy» men «Botaqarasy», qunannan tórtinshi kelgen báıterektik Berik Esenǵalıevtiń «Aıtolqyny» men alamannyń úshinshi júldegeri Nurlan Muqtarovtyń «Asyltorysy», uly alamannyń jeńimpazy «Qazyna» jáne osy jarysta bestikti túıindegen bókeıordalyq Igibaı Aıtmuqashevtiń «Malchıgi».
Barlyq jeńimpazdar men júldegerler QR «Báıge» federatsııasynyń atynan kýbok, dıplom, medaldarmen, sondaı-aq demeýshiler atynan aqshalaı sertıfıkattarmen marapattaldy. Báıgeniń jalpy júlde qory — 30 mıllıon teńge.
«Báıgeden Qazaqstan chempıonaty on kezeńnen turady. Oralda toǵyzynshy irikteý kezeńi ótkizildi. Sońǵy, fınaldyq kezeń 6 qazan kúni Astanada bolady», dedi QR «Báıge» federatsııasynyń vıtse-prezıdenti Jomart Saıbolatov.
Eske sala keteıik, budan buryn qazaqstandyq Kabırhannyń Dýbaıda ótken jarysta taǵy da top jarǵanyn jazǵan bolatynbyz.
