Oralda baıdarka men kanoedan jarys ótýde
ORAL. QazAqparat - Oralda baıdarka men kanoeda eskek esýden jasóspirimder arasynda QR «Qaıyq» federatsııasynyń kýbogy úshin jarys ótýde, dep habarlaıdy QazAqparat tilshisi.
Tuńǵysh ret uıymdastyrylyp otyrǵan kýbok saıysyna Almaty, Atyraý, Qyzylorda jáne Batys Qazaqstan oblystarynyń jas eskekshileri qatysýda.
QR Mádenıet jáne sport mınıstrligi Sport jáne dene shynyqtyrý isteri komıteti tóraǵasynyń orynbasary Asqar Esimovtiń aıtýynsha, atalmysh jarystyń Aq Jaıyq jerinde ótýi tegin emes. Munda olımpıadalyq oıyn túri bolyp esepteletin eskek esý sportynyń jaqsy dástúri qalyptasqan.
Aleksandr Akýnıshnıkov 1986 jyly álem chempıony atansa, qazirgi tańda onyń shákirtteri Alekseı Dergýnov pen Andreı Ergýchev halyqaralyq jarystarda olja salyp júr. Úsh birdeı olımpıadaǵa qatysqan A.Dergýnov Azııa chempıony atansa, Rıo olımpıadasynda baq synaǵan A.Ergýchev Azııa oıyndarynyń jeńimpazy bolyp úlgerdi. Olardyń sońynan izbasarlary da ósip keledi.
2017 jyly eskek esýden Oralda Qazaqstan ІV jastar oıyndary ótse, aldaǵy jyly el birinshiligin uıymdastyrý kózdelýde.
BQO dene shynyqtyrý jáne sport basqarmasynyń basshysy Ásııa Amanbaevanyń sózine qaraǵanda, óńir eskekshileri qajetti qural-jabdyqtarmen jasaqtalǵan. Bolashaǵynan úmit kúttiretin jas eskekshiler respýblıkalyq mektep-ınternat, kolledjderge alynýda. Endi eskekshilerdiń qys kezinde de jattyǵýyna jaǵdaı týǵyzý maqsatynda qam jasalýda.
Aıta keteıik, kýbok jarysy 28 shildede márege jetedi.
