Oralda «Batys Qazaqstan elektr jelilerin taratý kompanııasy» AQ-nyń mereıtoıy atalyp ótildi
ORAL. QazAqparat - Búgin Ǵ.Qurmanǵalıev atyndaǵy oblystyq fılarmonııa zalynda Oral elektr jelileri basqarmasy Batys Qazaqstan energo aýdandyq basqarmasynyń 50 jyldyǵy jáne «Batys Qazaqstan elektr jelilerin taratý kompanııasy» AQ-nyń 20 jyldyǵy atalyp ótildi, dep habarlaıdy QazAqparat.
Saltanatty sharada batysqazaqstandyq enertetıkterdiń jarty ǵasyr ishinde júrip ótken joly, qalyptasý kezeńderi, kásiporyn tynysy derekti fılmnen kórsetildi.
Sharaǵa qatysqan oblys ákimi Altaı Kólginovtiń atap ótkenindeı, energetıkterdiń mereıtoıy el táýelsizdiginiń 25 jyldyǵymen tuspa-tus kelip otyr. Energetıkalyq sala el ekonomıkasyndaǵy mańyzdy býyn bolyp esepteledi. Halyqtyń kúndelikti tynys-tirshiligi men ómirlik mańyzy zor nysandardyń qalypty qyzmet etýi osy sala qyzmetkerleriniń qajyrly eńbegine baılanysty. Aýa raıynyń nebir kúrdeli jaǵdaıyna qaramaı, elektr jaryǵynyń úzdiksiz berilýi úshin kúresetin de osy energetıkter. Mysaly, qazan aıynyń sońǵy kúninde qalyń jaýǵan qardyń áserinen Oral qalasynyń birneshe aýdanynda elektr jaryǵy sónip qaldy. Sony barynsha tez qalpyna keltirý úshin brıgadalar jumyldyrylyp, olar syn tezinen shyǵa bildi. Kúni búgin qar jaýyp, jel kúsheıip tur. Aldaǵy qysta da aýa raıy tosyn minez kórsetýi ábden yqtımal. Sonyń bárinde sala qyzmetkerleri jiti qımyl tanytyp, senim údesinen shyǵatynyna senim mol.
Táýelsizdik jyldary jetken tabys az emes. Sonyń biri retinde oblystyń energetıkalyq táýelsizdikke qol jetkizgenin aıtýǵa bolady. Sońǵy jyldary iske qosylǵan elektr stansalary men Oral transformator zaýyty tek ózimizdi qamtyp qana qoımaı, ónimdi shetke shyǵarýǵa da múmkindik berip otyr.
Saltanatty shara barysynda sala úzdikterine oblys ákiminiń alǵyshattary, basqa da marapattar tabys etildi.
