Oralda batagóı qarııalar baıqaýy márege jetti
BQO mádenıet, arhıvter jáne qujattama basqarmasynyń qoldaýymen oblystyq halyq shyǵarmashylyǵy ortalyǵy men ardagerler keńesi uıymdastyrǵan saıysqa aýdandar men Oral qalasynan iriktelip kelgen 15 batagóı qarııa qatysty.
Ulttyq salt-dástúr men batanyń tárbıelik mánin nasıhattaý, keıingi urpaqty úlkendi qurmetteı bilýge, ataly sózden ǵıbrat alýǵa tárbıeleý, adaldyq pen ádildikke, adamgershilikke úndeý baǵytynda ótkizilgen baıqaý barysynda úmitkerler aldymen ózderin tanystyrdy. Ekinshi kezeńde «El esindegi batalardan» úzindi aıtýdan baq synasty. Al «Batamen el kógerer» atty úshinshi kezeńde úıge berilgen tapsyrma - bata túrlerin jatqa aıtyp, túrli kórinisterdi kórsetti.
Saıys qorytyndysynda tasqalalyq aqsaqal Jumageldi Úmbetálıev bas júldeni jeńip alsa, qaratóbelik Ertaı Serdalın birinshi, zelenovtyq Satybaldy Tólegenov pen jańaqalalyq Amanjan Salaýatov ekinshi, shyńǵyrlaýlyq Temirǵalı Jantasov, aqjaıyqtyq Syılyhan Zeınetov, qaztalovtyq Ismaǵul Mýsın úshinshi orynǵa ıe boldy. Qatysýshylardyń birqatary dıplomant atansa, qalǵandaryna alǵyshat tabys etildi. Baıqaýdyń bas júldegeri J.Úmbetálıevtiń ıyǵyna shapan jabylyp, ol jurtshylyqqa óz batasyn berdi.
Oblystyq halyq shyǵarmashylyǵy ortalyǵynyń dırektory mindetin atqarýshy Nurgúl Berdashevanyń aıtýynsha, «Rýhanı jańǵyrý» baǵdarlamasy aıasynda mundaı halyqtyq sıpattaǵy sharalar jalǵasatyn bolady.
