Oralda baspanasy órtengen turǵyn kompanııadan 13 mln astam teńge óndirdi
ORAL. KAZINFORM — Oral qalasynyń № 2 sotynda erekshe azamattyq is qaraldy.
BQO saýda jáne tutynýshylardyń quqyqtaryn qorǵaý departamentiniń basshysy Elmıra Qımatovanyń málim etkenindeı, Oral qalasynyń turǵyny 2025 jylǵy 17 tamyzda kompanııa dúkeninen quny 174,990 myń teńge turatyn kir jýatyn mashına satyp alǵan.
Elmıra Nurqyzynyń sózine qaraǵanda, kir jýatyn mashına kúrdeli jóndeý júrgizilgen jańa úıdegi páterdiń as úıine ornatylǵan. Sol jyly 11 qyrkúıekte páterde órt bolǵan. Órt-tehnıkalyq saraptama qorytyndysyna sáıkes ot kir jýatyn mashınadan shyqqan.
Saldarynan páterge, sondaı-aq dúnıe-múlikke zalal keltirilgen. Ádilet mınıstrligi sot saraptamalary ortalyǵynyń qorytyndysyna sáıkes qalpyna keltirý-jóndeý quny 7 mln 857,676 myń teńgege baǵalanǵan.
Talapker áıel kompanııadan jaramsyz bolǵan dúnıe-múlikke qosa basqa da materıaldyq jáne moraldyq shyǵyndy óndirýdi talap etken. Ol otbasymen órtten keıin birneshe aı boıy jalǵa alǵan páterde turǵan.
Áıel materıaldyq shyǵyndardy sotqa deıingi tártippen óndirý týraly jaýapkerden ótingen, biraq onyń talabyn oryndaýdan bas tartylǵan.
— Sot sheshimimen talap aryz ishinara qanaǵattandyryldy. Atap aıtqanda, turǵynnyń paıdasyna qalpyna keltirý-jóndeý quny retinde 7 mln 857,676 myń teńge, 4 mln 090 myń teńge materıaldyq shyǵyn, 500 myń teńge moraldyq zalal, 87,580 myń teńge memlekettik baj salyǵy, 315,360 myń jáne 150 myń teńge (saraptama jáne basqa shyǵyndar), barlyǵy 13 mln astam teńge óndirildi. Kompanııa tarapynan kir jýatyn mashınanyń qujattary usynyldy. Alaıda qujattar taýar sapasynyń kepili bolyp sanalmaıdy. Sot sheshimi zańdy kúshine engen joq, — dedi E.Qımatova.
Eske sala keteıik, budan buryn BQO-da 90-nan astam kásipkerdiń saýda baǵasyn asyryp satqany belgili bolǵanyn jazǵan edik.
