Oralda «BASK» kólik-logıstıkalyq ortalyǵy salynýda
ORAL. QazAqparat - Oral qalasynda «BASK» kólik-logıstıkalyq ortalyǵy salynýda, dep habarlaıdy «QazAqparat» tilshisi.
BQO jolaýshylar kóligi jáne avtomobıl joldary basqarmasynyń basshysy Mırjan Satqanovtyń aıtýynsha, «BASK» kompanııasy júzege asyryp jatqan jobanyń birinshi kezeńinde avtokólik ıelerine qujat rásimdeýge múmkindik beretin arnaıy qyzmet kórsetý ortalyǵy ashylady. Muny bıylǵy naýryzdyń aıaǵyna qaraı paıdalanýǵa berý kózdelýde. Qazirgi kezde syrtqy jumystary bitip, ishki sharýalary ǵana qaldy. Sodan keıin qonaqúı, júk kólikteri turatyn arnaıy turaqtar, basqa da qajetti oryndar salynady. Joba 2020 jylǵa deıin tolyq júzege aspaqshy.
Batys Qazaqstan Reseıdiń bes birdeı oblysymen shektesetindikten, kólik-logıstıkalyq ortalyq oryn tebetin jer (Zachagan kenti) tranzıtti júk tasymaly úshin qolaıly bolyp esepteledi. Budan, mysaly, Atyraý, Aqtóbe, Saratov, sondaı-aq Oral arqyly Samara, Orynborǵa shyǵýǵa bolady.
Elbasymyz keshegi Joldaýynda kólik-logıstıkalyq ınfraqurylymnyń tıimdiligin arttyrý baǵytynda tyń mindetter júktedi. Osy oraıda Batys Qazaqstan oblysynda da tıisti jumystar atqarylatyn bolady.
Óńirde avtokólikpen tasymaldanǵan júk kólemi jyl sanap kóbeıip keledi. Aıtalyq, ótken jyldyń 11 aıynyń ózinde júk aınalymy 2798,6 mln tonna-shaqyrymǵa jetip, aldyńǵy jylǵydan 5 paıyzǵa artty.
Oǵan qosa áýe tasymaly da erekshe mańyzǵa ıe. «Oral» áleýmettik-kásipkerlik korporatsııasy «Oral» halyqaralyq áýejaıyn jańǵyrtý jumystaryn júrgizýde. Endi Batystan Shyǵysqa jáne odan keri qaraı júkterdi kedergisiz tasymaldaý úshin onlaın rejıminde tsıfrlyq tehnologııa engiziledi. Atalmysh áýejaı arqyly shet elderge de qatynaý múmkindigi kóbeıýde. Aıtalyq, ótken jyly Máskeý, Frankfýrt, Antalııa, Sharm-el-Sheıh (Egıpet) qalalary baǵytynda áýe baǵyttary ashylsa, munyń aıasy aldaǵy ýaqytta keńeıe túsetin bolady.
Sol sekildi Oral qalasy ákimdigi qoǵamdyq kólikterdiń jumys sapasyn arttyrý tujyrymdamasyn qolǵa aldy. ıAǵnı 2017-2020 jyldar aralyǵynda kólikte tsıfrlyq tehnologııalar qoldanýǵa den qoıylmaq. Qazirdiń ózinde «Bas report» qalalyq kólikterdi dıspetcherleý júıesi, elektrondy jolaqy tóleý júıesi engizilýde.
«Memleket basshysynyń tapsyrmalaryna sáıkes kólik salasynda tsıfrlyq tehnologııalardy engizýge, qazirgi zamanǵy ozyq tásilderdi paıdalanýǵa barynsha mán beriletin bolady», dedi «QazAqparat» tilshisine M.Satqanov.
