Oralda bas jospardy túzetý jobasyna qatysty shý shyqty
ORAL. KAZINFORM – Oral qalasynda bas jospardy túzetý boıynsha qoǵamdyq tyńdalym ótkizildi.
Jıyn kezinde qala turǵyny Danıl Makatýha ákimdik saıtynda júktelgen jobalyq materıaldardy zerttegen kezde onda kóbinese Oral emes, Qaraǵandy jáne Semeı qalalarynyń derekteri engizilgenin málimdedi. Onyń sózine qaraǵanda, barlyq esep Oralǵa esh qatysy joq derekter negizinde jasalǵan. Sondaı-aq atalǵan bas jospar jobasy úshin jobalaýshy mekemege 250 mln teńge tólengeni belgili boldy.
Osy máselege oraı Kazinform tilshisi Oral qalasy ákimdigine suraý joldady.
Ákimdikten túsken málimetke qaraǵanda, Oral qalasynyń bas josparyn túzetý jobasy 2023 jyldan bastap «Grado» JShS jobalaý uıymymen kelisimshart negizinde ázirlenip jatyr.
Jobaǵa qatysty qoǵamdyq tyńdaý Qazaqstan Respýblıkasy Indýstrııa jáne ınfraqurylymdyq damý mınıstriniń 2020 jylǵy 30 qyrkúıektegi № 505 buıryǵymen bekitilgen «Qala qurylysy jobalaryn ázirleý, kelisý jáne bekitý qaǵıdalaryna» sáıkes uıymdastyryldy. Osy talaptarǵa sáıkes Oral qalasy ákimdiginiń resmı saıtyndaǵy «Qoǵamdyq tyńdaýlar» bóliminde jobanyń túsindirme jazbalary men grafıkalyq materıaldary ornalastyrylǵan.
- Alaıda tehnıkalyq qatelik saldarynan saıtqa Oral qalasyna qatysy joq ári shyndyqqa sáıkes kelmeıtin bastapqy materıaldar júktelip ketkenin habarlaımyz. Qazirgi ýaqytta bul materıaldar tıisti zań talaptaryna saı durys nusqalarymen tolyq aýystyryldy. Aldaǵy kúnderi belgilengen tártipke sáıkes qoǵamdyq tyńdaýdyń jańa kúni jaqyn arada jarııalanatyn bolady, - delingen resmı jaýapta.
Oral qalasy ákiminiń orynbasary Azamat Halelov atalǵan jıyn qoǵamdyq tyńdalymnyń bastapqy kezeńi ekendigin jetkizdi.
- Qoǵamdyq tyńdalymdar halyqtyń pikirin tyńdaý, retteý úshin ótkiziledi. Aldaǵy tamyz, qyrkúıek aılarynda qorytyndy jıyndar bolady. Sol kezde maquldanǵan derekter ǵana jobaǵa engizilip, bekitý úshin qalalyq máslıhatqa, odan ári Úkimetke joldanady, - dedi A.Halelov.
Eske sala keteıik, budan buryn Oralda salynyp jatqan jaıly mektep qurylysy nelikten kesheýildegenin jazǵan edik.