Oralda barlyq avtobýstarǵa GPS-navıgator ornatý kózdelýde
ORAL. QazAqparat - Oral qalasynda bıyl 500 avtobýstyń bárine GPS-navıgator qurylǵysyn ornatý kózdelýde, dep habarlaıdy «QazAqparat» HAA tilshisi.
Qala ákimi Narıman Tóreǵalıevtiń aıtýynsha, sonda árbir jolaýshy uıaly telefon arqyly avtobýstyń qaıda kele jatqanyn nemese aıaldamaǵa qashan soǵatynyn bilip otyratyn bolady. Buǵan deıin 10 qalalyq baǵytta (217 avtobýs) atalmysh qurylǵy ornatylyp, jolaýshy tasymaldaıtyn kásiporyndarda dıspetcherlik pýnktter jabdyqtaldy.
Qalada barlyǵy 33 baǵyt bolsa, kún saıyn solar boıynsha 500-deı avtobýs jolǵa shyǵady. Sonyń ishinde 150-iniń syıymdylyǵy úlken, 210-y ortasha, 140-y - shaǵyn avtobýstar. Rezervte turǵandardy qosqanda, 644 avtobýs bolǵanymen, sonyń 61 paıyzy jańartýdy qajet etedi. Baǵyttardyń jalpy uzyndyǵy - 1316 km. Barlyǵy 6 tasymaldaýshy kásiporyn qyzmet kórsetedi. Jolaýshy tasymaldaý sapasyn arttyrý maqsatynda 191 «GAZel» shaǵyn avtobýstarynyń 105-i nemese 55 paıyzy syıymdylyǵy úlken kóliktermen aýystyryldy.
Alaıda avtobýstardyń qozǵalys kestesin saqtamaıtyny, aıaldamadaǵy adamdardy, ásirese, balalardy almaı ketetini týraly turǵyndardan aryz-shaǵym kóp túsetini jasyryn emes. Mysaly, №7 baǵytta qatynaıtyn «PAZ» avtobýstaryna tańerteńgilik jáne keshkisin jumystan qaıtarda miný múldem qıyn. Tipti adamdardyń kóptigi sondaı, bir-birine tapalyp jatady.
Kólik zańnamasyna sáıkes tasymaldaýshy kásiporyndar jolaýshy tasymaldaý sapasy men qaýipsizdigin qamtamasyz etýi tıis. Osy talaptardy saqtamaǵany úshin jáne turǵyndardan aryz-shaǵymnyń kóp túsýine baılanysty №17, 36 jáne 51-baǵyttar boıynsha qyzmet kórsetetin «Passajır-avto» JShS-men 2016 jylǵy 1 jeltoqsannan bastap kelisim-shart úzildi. Bul baǵyttar jańa konkýrs ótkenge deıin basqa tasymaldaýshyǵa berildi.
Jalpy, bul máseleni túpkilikti sheshý úshin «Oral» ÁKK» UK-men birlese otyryp, Úkimettiń qoldaýymen Eýropa qaıta qurý jáne damý banki qarjysy esebinen qalalyq qoǵamdyq kólikti jańǵyrtý oılastyrylýda.
Aıta keteıik, atalmysh másele turǵyndar tarapynan keshe qala ákiminiń eseptik kezdesýinde de kóterilip, buǵan óńir basshysy Altaı Kólginov te arnaıy toqtaldy.
«Biz bul máseleni tasymaldaýshy kásiporyndarmen birlese otyryp, keshendi túrde sheshetin bolamyz. Eń bastysy, avtobýs qatynasy turǵyndar úshin qolaıly bolýy kerek. Keıbir baǵyttar boıynsha qosarlana júrý kezdesedi, sondyqtan avtobýs jetkilikti bolýy da múmkin, biraq júıe joq. Adamdar kóp júretin kezde qystygúni balalardy almaı ketý aqylǵa syımaıdy. Bul rette, ásirese, №7 baǵyt boıynsha qyzmet kórsetýshilerge qatysty qatań shara alatyn bolamyz», dedi oblys ákimi.
