Oralda balmuzdaqtan ishek juqpasy anyqtaldy

ORAL. QazAqparat - Oralda balmuzdaqtan alynǵan synamadan ishek juqpasy anyqtaldy, dep habarlaıdy QazAqparat tilshisi.

BQO qoǵamdyq densaýlyq saqtaý departamenti azyq-túlik nysandaryn sanıtarlyq-gıgıenalyq qadaǵalaý bóliminiń basshysy Elvıra Tóleýovanyń aıtýynsha, ishek juqpasyn juqtyrýdyń negizgi joldarynyń biri tamaq ónimderi bolyp otyr. Sonyń ishinde balmuzdaq, ásirese, balalar úshin qaýpi joǵary ónimder qataryna kiredi.

Turǵyndar arasynda ishek juqpasynyń taralýyna jol bermeý maqsatynda jumsaq balmuzdaq óndiretin 17 nysanǵa jospardan tys tekserý júrgizildi. Sonyń nátıjesinde úı jaǵdaıynda jasalǵan jumsaq balmuzdaqtyń eki synamasynan ishek juqpasy anyqtaldy. Osyǵan oraı atalmysh nysandaǵy zańdy tulǵaǵa qatysty QR Ákimshilik quqyqbuzýshylyq kodeksiniń 425-baby 1-bóligine sáıkes ákimshilik hattama toltyryldy. Úı jaǵdaıyndaǵy jumsaq balmuzdaq daıyndaý qyzmetin toqtatý týraly qaýly shyǵaryldy. Materıal BQO ekonomıkalyq sotyna qaraý úshin joldandy.

Osyǵan oraı BQO qoǵamdyq densaýlyq saqtaý departamenti balmuzdaqty satyp alǵan kezde onyń daıyndalý merzimine, sapa belgisine nazar aýdarý, kóshedegi saýda núktelerinen almaý qajettigin eskertedi.

Aıta keteıik, oblysta turǵyndardyń ótkir ishek juqpasymen aýyrý kórsetkishi ótken jyldyń osy kezeńimen salystyrǵanda, 1,2 esege ósken. Negizinen aýrý 14 jasqa deıinge balalar arasynda tirkelýde, mundaǵy ósim - 32,4 paıyz. Sonymen qatar salmonellez derti 1,1 esege kóbeıip otyr.