Oralda balqytylǵan qarýdan 150 kg metall alyndy
ORAL. QazAqparat - «KazArmaProm» JShS zaýytynda 85 qarý balqytyldy, dep habarlaıdy «QazAqparat» HAA tilshisi.
BQO ishki ister departamentiniń baspasóz qyzmetinen túsken málimetke qaraǵanda, atalǵan shara toqsan saıyn ótkizilip keledi. BQO ishki ister departamenti bastyǵynyń orynbasary, polıtsııa polkovnıgi Talǵat Rahmetov jetekshilik etetin komıssııa qarýdy teksergennen keıin peshke jóneltti. Sonyń ishinde 62 tegis uńǵyly ańshy myltyǵy, 8 gazdy tapansha, 3 travmatıkalyq qarý, 4 pnevmatıkalyq tapansha, 2 sholaq myltyq, 6 dana zattaı aıǵaq joıyldy. Munyń bári - turǵyndar óz erkimen tapsyrǵan jáne tárkilengen qarýlar.
Balqytylǵan qarýdan 150 kg metall alyndy.
Eske sala keteıik, bıyl óńir turǵyndarynda zańsyz saqtalǵan qarý men oq-dári jáne jarylǵysh zattardy satyp alýǵa respýblıkalyq bıýdjetten 8 mln. 034 myń teńge bólinip otyr. Ótken jyly turǵyndar 224 atys qarýyn tapsyryp, bul maqsatqa 10 mln. astam teńge jumsalǵan bolatyn.
