Oralda balalarǵa arnalǵan «Mýza» kompozıtsııasy ashyldy
ORAL. QazAqparat - Batys Qazaqstan oblysynda 1 maýsym - Halyqaralyq balalardy qorǵaý kúni keńinen toılandy, dep habarlaıdy «QazAqparat» tilshisi.
Oral qalasynda atalmysh mereke aıasynda birneshe shara uıymdastyryldy. Abaı alańynda alǵash ret balalar men jastar mýzykalyq orkestrleri men ansamblderiniń saltanatty sherýi ótip, oǵan 1500-den astam oqýshylar qatysty.
«Máńgilik el» jalpyulttyq ıdeıasyn júzege asyrý aıasynda jas urpaqty otanshyldyqqa baýlýdy maqsat etken sherýge kelgender qatarynda J.Dosmuhamedov atyndaǵy pedagogıkalyq kolledjdiń syrnaıshylar ansambli, daryndy balalarǵa arnalǵan S.Seıfýllın atyndaǵy №11 oblystyq qazaq mektep-ınternaty kesheniniń úlgili «Atamura» halyq aspaptar orkestri, №1, №2, №3 balalar mýzyka mektepteri skrıpkashylarynyń qurama ansambli, №5balalar mýzyka mektebiniń «Arman» hory, Valdorf baǵytyndaǵy mektep-gımnazııanyń fleıtashylar ansambli, respýblıkalyq jáne halyqaralyq baıqaýlarda júlde alyp júrgen basqa da ujymdar boldy.
Oral qalasynyń ákimi Narıman Tóreǵalıev sherýge qatysýshylar men mereke qonaqtaryn Halyqaralyq balalardy qorǵaý kúnimen quttyqtap, elimizde jetkinshekterdiń tereń bilim alyp, bos ýaqyttaryn mándi de sándi ótkizýlerine barynsha jaǵdaı jasalyp otyrǵanyn jetkizdi.
Bul kúngi erekshe jańalyq el táýelsizdiginiń 25 jyldyǵyna oraı iske qosylǵan oqýshylar jáne jastar saraıy aldynda «Mýza» kompozıtsııasynyń ashylýy boldy. Atalmysh saraıda balalardyń ynta-qabiletine qaraı túrli úıirmeler jumys jasaıdy. Endi, mine, olardyń shabytyn shaqyratyn jańa eskertkish dúnıege keldi. Kompozıtsııa avtory Dmıtrıı Baımuqashevtiń aıtýynsha, áınekplastıkadan jasalǵan eskertkishtiń bıiktigi - 5 metr. Aınalasyn abattandyrýdy qosqanda, 5 mln. teńge jumsalǵan.
Shahar basshysy sondaı-aq mereke qurmetine Dostyq úıinde daryndy balalarmen kezdesip, emin-erkin áńgimelesti. Dóńgelek ústel janyna oqý ozattary, sporttyq jarystar men pándik olımpıadalardyń, túrli baıqaýlardyń jeńimpazdary jınaldy.
Bıyl qala mektepterinde 40 myńnan astam oqýshy bilim alsa, olardyń arasynda talanttylary az emes. Qala tarıhynda birinshi ret birden tórt jańa mekteptiń salynýy da memleket tarapynan bilim berý salasyna aıryqsha kóńil bólinip otyrǵandyǵyn kórsetedi.
Halyqaralyq balalardy qorǵaý kúnine arnalǵan sharalar oblys aýdandarynda da uıymdastyryldy.
