Oralda balalardy júzýge úıretetin jaǵajaı ashyldy
ORAL. QazAqparat - BQO TJ departamenti jedel qutqarý jasaǵy aýmaǵynda balalardy júzýge úıretetin jaǵajaı ashyldy, dep habarlaıdy «QazAqparat» tilshisi.
BQO TJ departamentinen túsken málimetke qaraǵanda, qaıǵyly jaǵdaılardyń aldyn alý maqsatynda balalardy júzýge úıretetin jaǵajaıdyń qajettigi týraly másele ótken jyly oblys ákimdiginde kóterilgen bolatyn. Óńir basshysynyń qoldaýymen múddeli memlekettik organdarmen birlese otyryp, atalǵan joba qolǵa alyndy.
Jaǵajaıdyń ashylý rásimine «Atameken» jazǵy saýyqtyrý lagerinen 37 bala qatysyp, júzý daǵdylaryn birden úırene bastady. Olarǵa jedel qutqarý jasaǵy sýda qutqarý qyzmetiniń basshysy Alekseı Eremeev sýda ózderin qalaı ustaý kerektigin, qıyn jaǵdaıǵa ushyraǵandarǵa qolushyn berý, júzý quraldaryn paıdalaný joldaryn túsindirdi.
Endi osylaısha ár aptanyń sársenbi jáne juma kúnderi balalar kestege sáıkes júzýge úırenetin bolady.
Aıta keteıik, bıyldyń ózinde júzý bilmegendikten, 16 jáne 17 jastaǵy eki qyz bala jáne 17 jasar bozbala sýǵa ketken bolatyn. Oǵan qosa 12 adam qutqarylsa, sonyń beseýi - balalar.
