Oralda balalar otyrǵan avtobýstyń órtenýi: júrgizýshi men lager basshysy jaýapqa tartyldy
QazAqparat budan buryn jazǵanyndaı, Oralda balalar otyrǵan avtobýs órtengen bolatyn.
BQO polıtsııa departamenti baspasóz qyzmetiniń naqtylaýynsha, oqıǵa 13 maýsym kúni saǵat shamamen 12.40-ta R. Egizbaev pen G. Belger kósheleriniń qıylysynda №26 orta mekteptiń «Balaýsa» balalar lagerinen «Cinema Park» kınoteatryna 60 balany tasymaldaǵan «PAZ» jeke avtobýsy otqa orandy.
«Oqıǵadan zardap shekkender joq. Alaıda, avtobýstyń 1986 jylǵy júrgizýshisi kólik quralyn tehnıkalyq tekserýden ótkizbeı, jolaýshylardy tasymaldaǵan. Oǵan qosa, mindetti saqtandyrý polısi bolmaǵan. Júrgizýshi QR Ákimshilik quqyqbuzýshylyq týraly kodeksiniń 593-baby 1-bóligi, 590-baby 9-bóligi jáne 230-baby 2-bóligine sáıkes ákimshilik jaýapkershilikke tartyldy. Sonymen qatar, QR Eńbek kodeksiniń 64-baby 1-tarmaǵy 3-tarmaqshasyn buzǵany úshin №26 mektep dırektorynyń 13 maýsym kúngi buıryǵymen balalardy kınoteatrǵa aparý kezinde jaýapkershilik tanytpaǵan «Balaýsa» lageriniń basshysyna qatań sógis jarııalandy. Balalardy tasymaldaý kezinde joldaǵy qaýipsizdikti qamtamasyz etý úshin polıtsııa qyzmetkerleriniń alyp júrýine atalǵan mektep tarapyna BQO polıtsııa departamentine eshqandaı suranys túspegen», - dep habarlady vedomstvodan.
