Oralda balalar óner mektebiniń ǵımaraty ashyldy
ORAL. QazAqparat - Oral qalasyndaǵy Zachagan kentinde №1 balalar óner mektebiniń jańa ǵımaraty ashyldy, dep habarlaıdy «QazAqparat» HAA tilshisi.
Qala ákimi Narıman Tóreǵalıevtiń aıtýynsha, QR Táýelsizdiginiń 25 jyldyǵyna oraı shaharda ótken jyly oqýshylar jáne jastar saraıy ashylsa, endi, mine, Zachagandaǵy óner mektebi de jańa ǵımaratqa kóship otyr. Buryn ol №13 «Zolotoı klıýchık» balabaqshasynyń beıimdelgen bólmelerinde ornalasqan bolatyn. Jańa ǵımaratqa sondaı-aq kent ákimdigi de ornalasty. Buryn bos turǵan ǵımaratty jóndeýge qala bıýdjetinen 53 mln. teńge bólindi.
Munda sýret salý, ermeksaz, hormen án aıtýǵa arnalǵan jeke kabınetter bar, dombyra, fortepıano, halyq aspaptary, qobyz jáne hor úıirmeleri jumys isteıdi. Qyryqtan astam ustaz 343 balany túrli ónerge baýlıdy. Óner mektebiniń jańa ǵımaratqa kóshýi №13 balabaqshada qosymsha 50-60 orynnyń ashylýyna múmkindik berdi.
Jalpy, qalada 10 qosymsha bilim berý uıymynda 9859 oqýshy qamtylǵan, bul - shahar shákirtteriniń 26,13 paıyzy. Oǵan qosa ár mektepte úıirme, sektsııalar jumys jasaıdy.
Aıta keteıik, Zagachanǵa qarasty Komıntern aýylynda 70 oryndyq «Bóbek» jeke balabaqshasy da ashyldy.
«Jergilikti kásipker Gúlmıra Aıtqalıeva ashqan atalmysh balabaqshada qazirdiń ózinde jıyrmadan astam baldyrǵan tárbıelenýde. Bul shaǵynaýdanda buryn balabaqsha bolǵan joq edi. Onyń ústine ata-analar balasy úshin memlekettik balabaqshadaǵymen birdeı (12 myń teńgeden) aqy tóleıdi. Elbasy tapsyrmasyna sáıkes qolǵa alynǵan «Balapan» baǵdarlamasy aıasynda memleket pen jekemenshik áriptestikti damytý baǵytynda qazir qalada 22 jeke balabaqshada 1623 búldirshin tárbıelenýde. Osy jeke balabaqshalarǵa memlekettik tapsyrys esebinde (ár balaǵa shaqqanda 19354 teńgeden) 176 mln. 97 myń teńge bólindi, ıaǵnı 50 paıyzyn memleket kóteredi. Oǵan qosa qalada 50 memlekettik balabaqsha, 25 shaǵyn ortalyq, taǵy bir mektep-balabaqsha kesheni jumys jasaıdy. Qazir 13779 baldyrǵannyń 11203-i osy memlekettik balabaqshalarǵa barady. Shahar boıynsha 3-6 jastaǵylar balabaqshamen 99,5, 1-6 jastaǵylar 57,8 paıyz, al 5 jastaǵylar mektepaldy daıarlyqpen tolyqtaı qamtylǵan. Soǵan qaramastan, qazirgi tańda 16439 búldirshin balabaqsha kezeginde tur», dedi «QazAqparat» tilshisine qalalyq bilim berý bólimi basshysynyń orynbasary Batıqa Paıdına. 
