Oralda balalar mingen 2 mektep avtobýsy qar qursaýynda qaldy
ORAL. QazAqparat – Oralda qar qursaýynda qalǵan 24 adam evakýatsııalandy, sonyń 18-i – balalar, dep habarlaıdy QazAqparat tilshisi.
BQO Tótenshe jaǵdaılar departamentiniń baspasóz qyzmetinen málim etkenindeı, oqıǵa 4 naýryz kúni saǵat 20.30-da Novostroıka kentinen 4 shaqyrym jerde Derkól-Vetelkı aýyldyq jolynda boldy.
TJ departamentiniń kúshimen qar qursaýynda qalǵan 2 «PAZ» mektep avtobýsy men 7 jeńil kólik Novostroıka kentine (22 adam, sonyń 17-si – balalar) jáne Podhozǵa (2 adam, bireýi – bala) jetkizildi. Olarǵa medıtsınalyq kómek qajet bolǵan joq.
BQO TJD qazirgi kezde boranǵa baılanysty respýblıkalyq jáne oblystyq joldar barlyq kólik túrleri úshin jabyq ekendigin habarlady.
