Oralda balalar alańyndaǵy oqıǵa boıynsha tekserý júrgizilýde - ákimdik
QazAqparat budan buryn jazǵanyndaı, Oralda átkenshekte oınap júrgen 13 jasar bala eki saýsaǵynan aıyrylǵan bolatyn.
Atalǵan derek boıynsha qazirgi kezde QR QK 306-baby 2-bóligine (qaýipsizdik talaptaryna saı kelmeıtin taýarlardy shyǵarý nemese satý, jumystardy oryndaý ne qyzmetter kórsetý) sáıkes tergeý júrip jatyr.
Oral qalasy ákimdiginen túsken málimetke qaraǵanda, atalǵan nysan qurylysy 2021 jyly aıaqtalyp, qoldanysqa berildi. Merdiger - jergilikti «Jaıyq sıtı» JShS mekemesi. Jattyǵý jabdyqtary - jergilikti kásipkerdiń ónimi, qajetti ST-KZ sertıfıkaty bar.
Ákimdiktiń málimdeýinshe, qurylys aıaqtalǵan soń nysan aýmaǵynda vandalızm derekteri kóp kezdesedi. Bul búldirýlerdi jóndeý kepildik mindettemelerine jatpaıtyndyǵyna qaramastan, merdiger mekeme aqaýlardy joıý jumystaryn júrgizýde. Shilde aıynda keıbir jattyǵý jabdyqtaryn jóndeý bastaldy. Atalmysh nysan 2022 jyly Oral qalasy dene shynyqtyrý jáne sport bóliminiń «Oral» sport klýby« MKQK ıeligine (teńgerimine) berildi.
Jýyrda taǵy bir balalar alańynda fýtbol qaqpasy ústine qulaǵan 11 jasar bala kóz jumǵan bolatyn.
BQO polıtsııa departamentiniń málimeti boıynsha bul derek jazataıym oqıǵa dep tanyldy.
Oral qalasy ákimdigi eki alańnyń da «Oral» sport klýbynyń ıeliginde ekendigin rastady.
«Oral qalasy ákimdigi atalǵan sport klýbyna qatysty qyzmettik tekserý júrgizedi. Tekserý nátıjeleri boıynsha tıisti sharalar qabyldanatyn bolady. Sondaı-aq qalanyń barlyq sport jáne balalar alańdarynda aqaýlardyń bar-joqtyǵy tekseriledi. Anyqtalǵan buzýshylyqtar túzetiledi», - dep habarlady ákimdikten.