Oralda bala men er adamnyń ólimine baılanysty tergeý júrgizilýde
ORAL. QazAqparat - Oralda qazylǵan shuńqyrǵa batyp ketken bala men er adamnyń ólimine baılanysty tergeý júrgizilýde, dep habarlaıdy QazAqparat tilshisi.
BQO ishki ister departamentiniń baspasóz qyzmetinen túsken málimetke qaraǵanda, qaıǵyly oqıǵa keshe saǵat 14.40-ta Derkól aýylynda «Lıýbıtel prırody» saıajaı qoǵamynyń 36-ýchaskesinde tirkelgen.
Sol saıajaı qoǵamynda turatyn 2013 jylǵy N. degen bala oınap júrip, qazylǵan shuńqyrǵa túsip, batyp ketken. Ony qutqaramyn degen Zelenov aýdanynyń 1989 jylǵy A. degen turǵyny da qaza boldy.
Qazirgi kezde Oral qalalyq ishki ister basqarmasy tergeý amaldaryn júrgizýde.
Oblystyq TJ departamenti jedel qutqarý jasaǵynyń bas qutqarýshysy Aıagóz Qojanbaevanyń aıtýynsha, káriz qudyǵyna bala qulap ketkeni jóninde saǵat 14.38-de qońyraý shalynǵan. Oqıǵa ornyna 4 qutqarýshy jáne 1 tehnıkadan turatyn jedel top jetken kezde balany qutqarǵysy kelgen er adamnyń da sasyq ıisti mólsherden tys jutqandyqtan, esinen tanyp, qaza bolǵany anyqtaldy. Qutqarýshylar arnaıy qurylǵynyń kómegimen káriz qudyǵyna túsken kezde áýeli er adamnyń, sosyn balanyn denesi tabyldy.
Eske sala keteıik, Oralda bala men er adamnyń septıkke batyp ketkenin budan buryn habarlaǵan bolatynbyz.
