Oralda BAQ salasynyń qyzmetkerleri marapattaldy
ORAL. QazAqparat - Búgin Oral qalasynda Baılanys jáne aqparat qyzmetkerleriniń kúnine oraı saltanatty rásim boldy, dep habarlaıdy «QazAqparat» tilshisi.
BAQ salasynyń qyzmetkerlerin kásibı merekelerimen oblys ákimi Altaı Kólginov quttyqtady.
«Barsha qoǵam elimizde bolyp jatqan jańalyq-ózgerister, túrli oqıǵalar jóninde jýrnalıster arqyly aqparat alyp otyrady. Ony jedel de sapaly jetkizý árkimniń kásibı sheberligine baılanysty. Qazirgi tańda óńirde seksennen astam buqaralyq aqparat quraldary bolsa, sonyń 55 paıyzy - jeke menshik BAQ-tar. Olardy memleket tarapynan qoldaý jumystary jasalyp keledi. Óıtkeni Elbasymyz «Rýhanı jańǵyrý» baǵdarlamasynda, sondaı-aq «100 naqty qadam» Ult josparynda ashyqtyq pen jarııalylyqty, halyqqa barynsha jaqyn bolýdy basty mindet etip qoıdy. Osy oraıda memleket júrgizip otyrǵan san salaly saıasatty da elge jetkizetin jýrnalıster. Qazir aqparattyń jeldeı júıtkigen zamany. Búgingi jańalyq erteń eskirip qalady. Áleýmettik jeliler, ǵalamtor qaýyrt damyp keledi. Sondyqtan BAQ ókilderine qoıylar talap ta kúsheıdi. Bıyl óńirlik «Oral óńiri» jáne «Prıýrale» gazetteriniń shyǵa bastaǵanyna týra bir ǵasyr tolǵaly otyr. Júz jyl ishinde buqaralyq aqparat quraldarynyń qandaı ózgeriske ushyraǵanyn, nendeı joldan ótkenin ardagerler jaqsy biledi. Olardyń da eńbegin biz eshqashan umytpaımyz. BAQ salasyndaǵy urpaqtar sabaqtastyǵy budan bylaı da jarasymyn taýyp, sheberlik tini úzilmeı, jalǵasa beretin bolady», dedi óńir basshysy.
Jýrnalısterdi merekemen sondaı-aq «Ortalyq kommýnıkatsııalar qyzmeti» RMM dırektory Artýr Nyǵmetov quttyqtap, izgi tilegin bildirdi. Sala úzdikterine oblys ákiminiń jáne «Ortalyq kommýnıkatsııalar qyzmeti» RMM-nyń alǵyshattary tabys etildi.
Marapattalǵandardyń qatarynda oblystyq «Oral óńiri» jáne «Prıýrale» gazeti redaktsııasynyń ujymdary, respýblıkalyq «Egemen Qazaqstan», «Kazahstanskaıa pravda» gazetteriniń menshikti tilshileri Qazbek Qabjanov pen Marına Ivanova, «QazAqparat» HAA óńirlik tilshisi Ǵaısaǵalı Seıtaq jáne basqalar bar ekenin aıta keteıik.
